Shillong, Jymmang 28 :U President ka LJP, Meghalaya, u Shri Jamil Ahmed u la ong ba ka jingtwa jong ka dome jong ka Ïingdorbar Thaw Ain ba thymmai ka Jylla ka pynpaw shai ïa ka jingbamsap kaba shyrkhei.
“Ka Meghalaya kam dei shuh kum ha ki por ki ba la leit noh ha ka ba kim don satia kino kino ki kam thok kam shukor bad ki kam bamsap, hynrei mynta ka jinglong jingman ka la kylla nadong shadong lyngba ki katto katne ki bor ki bym kwah satia ba ki nongshong shnong ka jylla kin roi kin par” ula ong ha ka kyrwoh.
Une u Nongïalam ka LJP ula pynpaw ba kat kum ka jingsngewthuh ka jong u, ka thong ka ba kongsan jong kine ki bor ka long ban pynkylla duk ïa ki nongshong shnong, ban pynbunkam ïa ki ba kin pyrkhat kumno ba kin lah ban im bad ba kim lah ban pynleit jingmut halor ka jinglong jingman ha ka jylla.
“Ka jingkhyllem ba dang don ka ba la jia ïa ka jingtei jong ka Assembly ka dei kawei na ki nuksa ka ba khraw tam ka ba pynpaw pyrthei ïa ki kam bam sap, bad pyrkhat sa katno pat ki jingjia ki ban dang paw pyrthei,” ong u Ahmed.
“Ka jylla ka dang iaksaid halor ki jingbym ïoh kam ïoh jam, ka jingkiew dor jong ki mar ki mta.Ka dor jong u sohsaw ka long haduh T.100 shi kilo.Ki ba riewspah ki nangkiew shaphrang, katba ki ba duk ki la nang tasam” ula bynrap haba pynpaw ïa ka jingbym lah ban mutdur kumno ki longïing baduk kum ki nongbylla sngi kin lah ban bsa ïa la ki jong ki khun ki kti.
Ka ïoh ka kot ka jylla ka don ha ka khep ka ba isynei, hynrei katto katne ki riew donbok ha ka jylla ki la nang khie spah.U la ong ba ki don shibun ki jingeh, hynrei ka jingkylla ka long katno ngut na ki, ki la ïoh ïa ka jingpynpaw lyngba kane ka sorkar ka ba mynta?
Ula pyntip ruh ba ha ka 13 bad 14 tarik mynta u bnai u la leit jngoh sha ka thain Mawkyrwat, kata ha ka por ba jur u slap bad ka ‘eriong, bad katto katne tylli ki ïing ki la shah pynjulor, laitylli ki dei ki ba u la ïohi da lade hi.U la ong ba u la leit jngoh ïa kane ka shnong ban bishar bniah halor ka jinglong jingman bad kyntu ruh ïa u Rangbah Shnong la ki don ne em ki myntri sorkar ne ki heh sorkar ki ba wan ban tohkit halor kane ka jinglong jingman, hynrei ka jubab ka long ym shym la don satia ki ban khein snep na ka liang ka sorkar halor ki lad jingiarap na ka bynta jong ki.
Shuh shuh u la ogn ba u Myntri ki kam sam um (PHE) u dei u MLA ka Mawkyrwat Constituency hynrei ki nongshong shnong kane ka thain ki dang ïai ngat ha ka jingkyrduh um.Halor kane ka mat, u la ong ba na ka liang ka party ka la thoh sha u Chief Secretary ka sorkar Meghalaya bad batai halor ka jinglong jingman.U la ong ba u la sakhi bad kyrpad ruh ïa ka sorkar ba kan iarap ïa kitei ki nongshong shnong ki ba ki ïing ki sem ki jong ki ki la shah pynjulor noh ha ka ‘eriong ‘erngit.
Kumta ruh une u president ka LJP u khot u wer ïa ki nongshong shnong ka jylla Meghalaya ba kin kyndit bynriew, ban tip ïa la ki jong ki hok, ban buh jingkylli ïa ka sorkar halor kino kino ki bynta ki ba kin sngewhun, ban ym pdiang ïa ka pisa ha ka por ilekshon namar ki vote jong ki, ki long ki ba kordor, ban jied ïa ki briew ki ba khuid bad ba shida ba kin long ki MLA ne ki nongmihkhmat jong ka.
