Ka jingtohkit ka dang ïaid, kyrpad u CS ïa ki samla NEHU ban sangeh shwa ka jingshah thngan

Shillong, Naiwieng, 19: U Chief Secretary jong ka Sorkar Jylla u Bah Donald P. Wahlang ha ka sngi Baar u la leit hi dalade ban ïakynduh markhmat ïa ki samla pule jong ka skulbah North Eastern Hill University (NEHU) kiba dang pynlong da ka jingïakhih shah thngan khlem pud sngi ban dawa hiar shuki ïa u Vice Chancellor u Prof. PS Shukla.
Ha ka jingïakren bad ki lad pathai khubor, u Chief Secretary ula ong, “ngi wan hangne da kawei ka jingthmu ban kyrpad ïa ki samla pule ba kin pynsangeh shwa shipor ïa ka jingïakhih shah thngan katba ka jingtohkit ka dang ïaid sakhmat.”
“Nga la ïakren ruh bad ki bad nga ong ruh ba balei kin hap ban pynsangeh shwa shipor ïa ka jingïakhih. Nga sngewskhem bad nga kyrmen ba kin ïashong pyrkhat lang para ma ki ryngkat bad ki kynhun bapher bapher kiba pynlong ïa ka jingïakhih ba kin pynsangeh shwa ïa ka jingïakhih katba ka jingtohkit ka dang ïaid mynta,” la bynrap u Bah Wahlang.
Ïa ka jingïakhih la pynlong da ka NEHUSU ba la kyrshan lang da ka KSU NEHU Unit, kynthup ruh ka jingai jingkyrshan lang jong ka NEHUTA bad NEHUNSA bad MeTTA.
Dang shen ka Ministry of Education ka Sorkar Pdeng ka la thaw ïa ka Enquiry Committee ba kynthup tang ïa u Prof DP Singh, uba dei u Chairman jong ka University Grants Commission (UGC) kum u Chairman jong ka komiti bad u Prof Dilip Chandra Nath, u Vice Chancellor barim ka Assam University ban tohkit halor ki kynrum kynram hapoh ka skulbah NEHU hadien ba la ïoh pdiang ïa ki jingujor na ki samla pule.
Ka Ministry of Education ka la aipor ruh 15 sngi ïa ka Enquiry Committee ban pyndep ïa ka jingtohkit kaba bniah bad ban phah ïa ka kaiphod.
Ha ka Lah Sngi u Blei u Vice Chancellor Incharge u Prof. N. Saha u la thung ïa ka Enquiry Committee ban tohkit ïa ki jingkynnoh pynïaid kam bakla bad ka jingbym lah treikam hapoh ka skulbah NEHU kaba lam sha ka jinglong jingman ba mynta.
U Prof. Saha u la pyntip ba ïa ka kaiphod jong ka Enquiry Committee yn sa aiti sha ka Enquiry Committee ba arngut ki dkhot ba la thaw da ka Ministry of Education, ka Sorkar India dang shen.
Ïa u Chief Secretary la synran lang da ka Director General of Police (DGP) ka Jylla ka Kong Idashisha Nongrang, ka Deputy Commisioner jong ka East Khasi Hills ka Kong RM Kurbah, u Addl. Deputy Commisioner u Bah Ronnie Wahlang, u Vice Chancellor Incharge u Prof. N. Saha ryngkat ka jingdonlang jong ki nongïalam ka Meghalaya Indigeneous Tribal Constitutional Rights Movement (MITCRM) kaba long ka shatri jong ka Synjuk ki Nongsynshar ka Bri Hynñiewtrep, ka Lympung ki Seng Kynthei, ka KSU, HNYF bad FKJGP.