Ka jingtih dewïong be-aiñ ka ai jingmyntoi ïa ki briew bym don akor, kiba pha jingma ïa kiwei pat: Kharkrang
Shillong, Rymphang 6: Ka jingjia ba bthei ka par dewiong ha East Jaiñtia Hills, kaba la pynlong ban duh noh ïa 18 tylli ki mynsiem ba lui lui ha ka jingjia ba shyrkhei bad kane kala paw pyrthei ïa ka jingtih dewiong beain hapoh ka jylla
Katkum ka kyrwoh khubor na u Bah Maraiahom Kharkrang uba dei u nongai ktien ba rangbah jong ka BJP Meghalaya Pradesh u la ong,Ngi na ka BJP Meghalaya ngi sngewsih jur ïa ka jingkhlad noh khlem dei por jong ki nongbylla kiba duk bad ngi pynpaw ïa ka jingsngewlem sha ki bahaiing hasem jong kiba la khlad noh, sha kiba la duh noh ïa kiba ïeid ba thoiñ jong ki ha kane ka jingjia kaba pynmong ïa ka jingmut jingpyrkhat ha ryngkat bad ka jingsngewsih.
“Ngi pynpaw ruh ka jingsngewnguh ïa u Myntri Rangbah duh ka ri, u Narendra Modi, uba la pynbna kloi ïa ka jingsiewbai lutksan ba 2 lak sha ki bahaïing jong kiba la khlad noh” ong u Bah Kharkrang.
U Bah Kharkrang u la ong, Kane ka jingjia kaba sngewsih ka lah ban pynkyndit ïa ki lad pathai khubor jong ka ri bad wat jong ka pyrthei hynrei ngi na ka BJP Meghalaya ngi la ju maham bunsien ba ka jingtih dewiong beain ka dei tang kawei pat ka kyrteng jong ka apot kaba ap ban jia.Katba ïa u trai jong ka par dewiong la kem hadien ka hukum jong ka ïingbishar High Court bad dang donkam ban leh shibun kiei kiei.
Ngi kyntu ïa ka Sorkar jylla ba kan sdang noh mardor ïa ka jingpyrkhing ïa baroh ki jait jingtih dewiong beain bad ban pynthikna ba uwei pa uwei u briew uba donkti ha kum kine ki kam un mad ïa ka jingpynshitom kaba tyngeh tam katkum ka ain.
Shuh shuh u Bah Kharkrang u la ong, Ngi kum ka jylla bad ka imlang sahlang ngim lah shuh ban shu ak matlah sah ia ki jingma jong ka jingtih dewiong be-ain bad khlem ka juk jingstad ne ka unscientific mining kaba ai jingmyntoi tang ia ki katto katne ngut ki briew ki bym don akor bad buh ïa ka jingim jong ki wei ha ka jingma.Ka Sorkar ka dei ban pynthikna ba ka jylla Meghalaya kan long lait na kane ka jingsniew kaba ki khot ka jingtih dewïong beaiñ!