Shillong, Nailar, 17: Ha ka sien kaba nyngkong ka khana pateng jong ka Land Port, Dawki, ki jaka treikam bapher bapher ka sorkar pdeng ba kynthup ïa ka Land Port Authority of India, ka Bureau of Immigration, ka Border Security Force, bad ki nongshong shnong ki la wanlang ban rakhe ïa ka sngi Laitluid ka Ri kaba 79.
Ka jingrakhe, kaba kynthup ka jingthung ïa ki dieng, la pynlong ha ka jingïatreilang bad ka project Regeneration Meghalaya (RM) ba la pyntreikam da ka Earth Tree Enviro Private Limited, Shillong. ïa kane ka prokram la pynlong ha conference room jong ka Land Port, Dawki, ha kaba la donlang da ki heh ki haiñ na kitei ki seng ba la kdew haneng.
Ha ki kyntien lamphang, u Dr. H.H. Mohrmen, uba la pynïaid ïa ka jingïalang, u la ong ba ka jingpyrshang ban pynitynnad ïa ka Land Port da kaba thung ïa ki dieng hapoh ka campus ka dei ban ai ki jingïaroh naba ka LP Dawki ka dei ka golden gateway na ka bynta ki briew ba marjan na Bangladesh sha Meghalaya. Ka Land Port ka dei kaba nyngkong eh kaba kin dei ban ïohi haba ki wan jngoh sha kane ka jylla bad ka ri.
U la ong ba kane ka jingrakhe, kaba la leh lyngba ka jingthung ïa ki tynrai dieng sawdong ka campus jong ka port, kadei ka jingai jingmut kaba khraw na u T.C. Chako, Regional Administrator, Land Port Authority of India, Dawki, uba kwah ban ïohi ïa kane ka thaiñ ba kan long kaba jyrngam.
Na ka liang u Sunny Donkurpar Mawïong, Director of Earth Tree, ha ka jingkren u la ïathuh halor ka Regeneration Meghalaya (RM) project, ha kaba ka Earth Tree Enviro Private Limited la pyntreikam ha ka jylla Meghalaya. U la ong ba kane ka project suki suki ka la nang ïoh ka jingkyrshan na ki nongshong shnong, ki kur bad wat na ka Jaiñtia Hills Autonomous District Council, kiba dangshen ki la ai ka kti ka mon ka kti ka diang ban kyrshan ïa kane ka bynta. Mynta da ka jingïatreilang bad ka Land Port Authority of India, Dawki, ka la wanrah sa kawei pat ka sienjam halor ka jingpyrshang ka project ban pyni tynnad bad pynwandur biang ïa ka jinglong ki jaka jong ka jylla state.
Katba ha ka jingkren u T.C. Chako, Regional Administrator, LPAI Dawki, u la pynpaw ka jingai khublei halor ka jingkyrshan ba la ïoh na ka Regeneration Meghalaya project bad pynpaw ka jingkyrmen, ba da ka jingïarap ka Earth Tree Enviro Private Limited, yn lah ban pynitynnad ïa ka port bad ban pynlong ïa ka, kaba jyrngam.
Na ka liang u Captain Dan Singh, Company Commandant, BSF Dawki, u la pynkynmaw ïa ka jingïalang ba u Myntri Rangbahduh ka ri u Narendra Modi u la khot ïa baroh ki nongshong shnong jong ka ri ban thung ïa ki dieng ban kynmaw ïa la ka jong ka kmie.
U Chief Immigration Officer, Dawki Land Port, P.S. Thombing, u la pynkynmaw ïa kiba don ha ka prokram ba ka Meghalaya ka la dep ïoh ki jingkyrkhu lyngba ka jingdon ka mariang kaba itynnad bad ka dei ka jingkitkhlieh jong ki nongshong shnong ka jylla ban pynneh ïa ka jingjyrngam jong ka. U Senoba Khonglah u la kren ha kane ka sngi ha ka jaka jong ka Regeneration Meghalaya project bad Earth Tree.
ïa kane ka prokram la pynshong shit da ki jingïaleh kolshor na ki khynnah bad ki samla ka thaiñ bad la pynkut pat ka jingleit thung ïa ki dieng da kiba la shah khot sngewbha hapoh ka jaka jong ka Land Port.
