Ka jingthung ïa ki dieng ka long thik kumba sumar hi ïa la ka kmie ba syriem kum ka mei mariang: H Lato

Shillong, Naitung, 20: Kum ka mynsiem ban pynneh pynsah ïa ka sawdong sawkun bad ka mei mariang, ka Rotary Club of Shillong Heritage (RCSH) ka la pynlong ïa ka jingthung dieng ha ka sngi Saitjaiñ naduh ka por 9 baje mynstep ha jaka jong ka Pine Mount School, Shillong. Ha kane ka sngi la wan ban ïashim bynta da ki dkhot ka shnong, ki ophisar ka tnat forest, ki nonghikai bad ki samla pule kiba la buh ka thong ban wanrah ïa ka jingjyrngam ha ka sawdong sawkun.
Ïa kane ka prokram thungdieng la pynlong hapoh ka jingïalap ban pynneh pynsah ïa ka mariang kaba la tip ka “Ek Ped Maa Ke Naam”- kaba dei ka jingïalap ha ka ri kaba pynshlur ïa ki riew shimet ban thung ïa u dieng ha ka kyrrteng jong ka kmie jong ki.
La don kumba 76 tylli ki tynrai dieng ba la thung, ba kynthup ïa ki Ligustrum Soh Paiat, Camellia japonica, bad Jacaranda mimosifolia, ba la jied na ka bynta ban pynneh ïa ka jinglong jyrngam bad ki dor ba ki don.
Ha kane ka sngi la wan ban ïashim bynta da ka H. Lato, IFS, Divisional Forest Officer, Social Forestry Division, ka Kong B. Nongbri, Principal of Pine Mount School, Rtn. Gayatri Marnie Batkhar, President ka Rotary Club Shillong Heritage, Rtn. Dr. Binayak Dutta, Chairperson, Environment Committee, RCSH, ha ryngkat bad ki nongtrei jong ka Pine Mount School, ki ophisar na Social Forestry Division, ki dkhot ka Rotary Club, bad kumba 50 ngut ki resident boarders jong ka skul.
Haba kren ha kane ka sngi ka H. Lato, IFS, ka la banjur halor ka jinglong kongsan ka sawdong sawkun. “Kane ka jingthung dieng ka dei ka sienjam kaba rit bad ban ai biang sha ka mei mariang haba rakhe ïa ka sngi ka jinglong kmie. Ka jingïalap ‘Ek Ped Maa Ke Naam’ ka pynkynmaw ïa ngi ba ki dieng ki long kum ki kmie, kiba pynwandur ïa ngi bad ka dei ka kamram jong ngi ban ïada bad ban tyngkai ïa ki.”
Katba Rtn. Dr. Binayak Dutta la pynpaw halor ka jingpyrshang jong ka Rotary Club ban ïada ïa ka sawdong sawkun bad banjur halor ka jingdonkam jong ki samla ban ïashim bynta ha ki kam pynneh bad sumar mariang.
Kum shibynta ban lehkmen ha kane ka prokram la sam haduh 105 ki song jingbam sha ki samla pule, ki nongtrei ka Pine Mount School, ki ophisar ka Social Forestry Division bad sha ki dkhot ka Rotary Club Shillong Heritage.
Ka Principal Pine Mount School ka la pynpaw ka jingai khublei ïa ka Rotary Club bad ka Social Forestry Division, haba ong ba kane ka jingpyrshang ka jingïatreilang kam dei tang ba ka pynitynnad ïa ka jaka hynrei ka pynrung ha ka jingmut ki khynnah pule ban shim ka jingkitkhlieh ban ïada ïa ka sawdong sawkun.
Kane ka prokram ka la kut da ka kyntien ai khublei bad la pynshlur ruh ïa ki khynnah skul ba kin sumar bad ïada ïa ki tynrai dieng ba long kum shi bynta na ka jingpule halor ka sawdong sawkun.