Ka jingthung ïa ki Consultant ka dei na ka bynta ban ïarap kumno yn pynheh ïa ka kad liengsuiñ

Shillong, Rymphang 24 : U Symbud Myntri Rangbah ba dei peit ïa ka Tnad Transport u Ma Sniawbhalang Dhar ha ka sngi Ba-ar, ula ïada ïa ka jingpynlut ka Tnad ha ka jingthung ïa ki Consultant, da kaba ong ba la thung ïa ki namar ki jingkyllaiñ kiba la mih hadien ka jingwanrah jingkylla thymmai ha ka jingpynïaid ïa ki kam ha kad liengsuiñ, ka jingthaw ïa ki polisi bad ka ban khmih ïa ki jingpyntrei ïa ki jingtei kiba kongsan.
Haba jubab ïa ka cut motion, u Ma Sniawbha ula pyntip ïa ka Iing Dorbar Thaw Aiñ ba ki Consultant ki la kyrshan ïa ka Aviation Vission jongka jylla khamtam ha kaba ïadei bad ka jingpynheh ïa ka Kad Liengsuiñ Shillong kaba ha Umroi , ka jingpyntreikam ïa ka Kad Liengsuin Baljek bad ki heliport ha Shillong bad Tura.
“Ka kynhun consultant ka la pynleit jingmut ha ka jingïatreilang bad ki agency bapher bapher kiba don bynta, kyrshan ha ka jingkhmih bniah ïa ki project bad pynthikna ïa ka jingïaid bha ki kam ba la pyntrei kat kum ka por ba la buh” ula ong.
U bynrap ba kane kajuh ka kynhun ka la ïarap ban thaw ïa ka Meghalaya Vehicle Scrappage Policy 2025, ka Motor Cab and Motorcycle Rental Rules, 2025 bad ka Chief Minister’s Regional Transport Scheme 2025.
Ka jingthungkam ïa ki ka long na ka bynta 24 bnai naduh ka 1 tarik Lber 2024 haduh ka 28 tarik Rymphang 2026, ha kaba lai ngut ki consultant la thung ba kin trei baroh shisngi.
Ka dor jong ka contract ka long 3.03 klur tyngka bad ïa ka jingsiew la pynlait man la u bnai kat kum ka thup jingpynlut bad jingshakri lem bad ka jingïaid ka kam.