Shillong, Kyllalyngkot 24: Ha kawei na ki sienjam kiba kongsan ban pynkhlaiñ ïa ka kamai kajih ki nongrep bad ban thaw ïa ka lad ban pynpoi beit beit ïa ki marrep na kper sha ki nongthied, ka 1917 iTEAMS hapoh jong ka Department of Agriculture and Farmers’ Welfare lyngba ka jingkyrshan ka Meghalaya Farmers’ (Empowerment) Commission (MEFC), ka la rai ban pynlong da ka ïew ki Nongrep kaba shisien shi bnai ha ka jylla ne ka State’s Monthly Farmers’ Market .
Ka SOMOI, kaba dei ka app khaïi pateng kaba mih hi na kane ka nongbah Shillong kan ïatreilang bad ka Farmers’ Markets ka sienjam ban shim ïa ki marrep beit beit na ki nongrep, ban pynkhlaiñ ïa ka jingkhaïi bad ban kyrshan ïa ki longïing kiba im jakpoh da ka rep ka riang. Da ka jingbtin lynti lyngba ka jingïohi jngai jong u Myntri Rangbah ka jylla u Conrad K. Sangma ban pynlong ïa ka rep ka riang kaba ïaineh bad kaba lah ban kamai don burom da man la ki nongrep ha ka jylla, kane ka jingtyrwa ïa katei ka ïew ka dei ka sienjam kaba kongsan ban pynkup bor ïa ki nongrep, ban kyntiew ïa ka jingsengkam lajong bad ban pynkhlaiñ ïa ka ïoh ka kot ha ka thaiñ.
Ha man ba pynlong ïa ka ïew ki nongrep kaba man la u bnai yn pynïaid ïew ïa 3 tylli ki jingthung kiba mih ha katei ka aiom ka ban ïaid ryngkat bad ka rukom pynmih ha ka jylla.
Kane ka sienjam ka thmu ban plie lad ïa ki nongrep ban don ïa ka rynsan kaba la aiti kyrpang ïa ki ban die ïa ki jingthung ki jongki sha ki nongthied nongpet bad ban kyrshan ïa ka jingseng kam lajong kiba don bynta ha kaba ïadei bad ka rep ka riang bad ki mar kiba pynmih lyngba ka jingthaiñ kti.
Ban pynduna ïa ki lad ban ïaid pateng na kiwei pat, ka thmu ban kyntiew ïa ka kamai kajih jong ki nongrep bad ban pynthikna ba kan don ka jingïoh kaba biang. Ka kyntiew ruh ïa ka jingpyndonkam da ki marrep kiba dang shu kheit, kiba na ka jylla, kiba shngaiñ ban bam ha ryngkat bad ka jingpynkhlaiñ ïa ka jingïadei jongki ïew ki hat ha sor bad nongkyndong kiba don ha kane ka jylla.
Ka Farmers’ Market kan pyni ruh ïa ki jingshet jingbam khnang ba ki nongleit sha kane ka ïew kin ïoh ïa ka lad ban mad ïa ki jingbam kiba la pynmih na ki mar rep kaba long ruh ka lad jong ka jingpynkhreh kaba na kper sha ka pliang beit da kaba pyndonkam da ki jingthung kiba la pynmih hi hapoh ka jylla.
Kane ka sienjam kan pynïasoh ruh ïa ka Farmers’ Market sha ka almanak ne Calendar jong ka kam jngohkai ha ka jylla Meghalaya bad ban buh ïa ka Shillong ha ka kyrdan kum kaba leh man la ka por, na ka kper sha ki miej bam bad ban kyntiew ïa ka shlem jong ka kam jngohkai lyngba ka rep ka riang ne agri-tourism.
