Ka jingthmu ban pynkynriah noh ïaka C&RD Block Umsning ka long kaba biang tam

Nongpoh, Nohprah 20: Hadien ka jingpynkhreh jong ki bor sorkar ban pynkynriah noh ïaka ophis treikam jong u Block Development Officer ka Umsning C&RD Block, na ka liang jong ki bor pynïaid shnong ka Umsning Town Dorbar ryngkat bad ki katto katne ki nongtrei jong katei ka ophis mynta ka sngi kila leit ban jurip syndon ïa ka jaka na ka bynta ban tei ïaka ophis kaba thymmai jong katei ka C&RD Block.
Ha katei ka jingleit jurip ïa ka jaka ban tei ïaka ophis treikam kaba thymmai ki nongïalam shnong ki la pynpaw ba ka jingthmu ban pynkynriah ïa katei ka ophis ka long kaba biang bad kam don kano kano ka jingthut haka leit ka wan namar ka jngai tang kumba 50 meter eiei na ka surok bah National Highway-6.
Ki la pynpaw ruh ba kane ka jingdon jong katei ka ophis ha katei ka shnong kan long ka jingkyrkhu ïaki paidbah khamtam ïaki rangbah shnong ki ban wan donkam haka ophis u Block Development Officer namar ka jaka kan long kaba kylluid na ka bynta ban buh kali, bad kumjuh ruh ka um bad kiwei ki jingdonkam yn sa lah ban pynbiang ha katei ka jaka kaba thymmai kaba yn sa tei ïaka Block.
Haba kren halor ka jingmih ki jingpyrshah na ki katto katne ki nongïalam sengbhalang na ka liang u Bah Rocky Kylla uba dei u Chairman jong ka Umsning Town Dorbar u la ong ba kum ki sengbhalang kim dei ban mih pyrshah ïa katei ka jingthmu hynrei ban ai ka jingkyrshan kumba ka long ka jingmyntoi naka bynta ki paidbah ba bun ba lang.
Shuh shuh ha kajuh ka por na ka liang jong ka Umsning Town Dorbar ka la ai ruh ïaka jingthoh sha u BDO ka Umsning C&RD Block kum ka jingkyrshan ïa katei ka jingthmu ban pynkynriah noh ïaka ophis sha Lum Umpih kaba dang hap hapoh ka jingpeit jong ka Umsning Town Dorbar kaba dei ruh ka jaka kaba la ai sngewbha da ka kong Ristila Nongbri kaba don ka jingheh kumba 2 akar
Kum ban shu pynpaw ka jingthmu ban pynkynriah noh ïaka Block Umsning sha Lum Umpih ka dei namar kiba bun ki jingbymbiang ha katei ka jaka kaba katei ka ophis ka ieng mynta, kynthup naduh ka jaka pynïeng kali, ka jingbymbiang ka um, ka jingbymioh ïaka bor internet kaba biang bad kiwei kiwei de kiba ka ophis kam da lah ban ai ïaka jingshakri kaba biang ïaki shnong kiba hap hapoh katei ka Umsning Block.
Haba ïakren bad ka Kong Victoria Kharnaior kaba dei ka Chairman jong ka Umsning Block Development and Monitoring Committee ka la ong ba ka jingshim ïaka rai ban rah noh ïa katei ka ophis ka long kaba biang bha khnang ba yn lah ban ai ka jingshakri kaba biang na ka bynta ka Block baroh kawei.
Ha katei ka jingleit jurip ïa katei ka jaka la ïadonlang u Bah Rocky Kylla uba dei u Chairman ka Umsning Town Dorbar u Bah Benedic Syngkli uba dei u Rangbah shnong ka Shnong Lumumpih, ka Kong Ristila Nongbri iba dei ka trai jaka, ki rangbah shnong kiba hap hapoh ka Umsning Town Dorbar bad ki nongïalam jong ka Seng Longkmie Umsning Pyllun.