Ka jingsynshar kaba 7 snem shiteng ka sakhi ba skhem bad long kawei ka NPP : Sniawbhalang

Shillong, Risaw 10: U Symbud Myntri Rangbah bad u nongïalam ka NPP u Bah Sniawbhalang Dhar ha ka sngi Thohdieng u la ong ba kam don kano kano ka jingïapher jingmut hapoh ka ïing ka sem jong ka NPP.
Haba jubab ïa ki jingkylli halor ka jingdon ka jingïapher jingmut hapoh ka NPP, u Bah Dhar u la kdew da kaba ong ba ka jingneh jong ka sorkar mynta la kumba 7 snem shiteng ka dei ka sakhi jong ka jingïalong kawei hapoh ka party.
“Hapoh ka ïing ka sem ka NPP, kam shym la don kano kano ka jingïapher jingmut. Phi la sakhi ha kine ki 7 snem shiteng. Ngi la ïatreilang kum ka kynhun bad baroh ki 33 ngut ki MLA,” ong u Bah Dhar haba kren sha ki lad pathai khubor.
U Bah Dhar u la pynïapher ïa ka jingskhem ka NPP bad ka jingsynshar jong ka seng Congress ha ki por ba la leit, kaba mad ïa ki jingïakajia long nongïalam ha manla ki 6 bnai.
“Lada phi kynmaw ba ha ka por ka jingsynshar ka Congress, manla ka 6 bnai ka don beit ka kam kajia nongïalam. Hynrei ha NPP, kam ju don kum kane ka jingjia. Phi tip bha ba kane kadei ka sorkar kaba neh bad kadei kawei na ki sorkar kaba skhem bha naduh ba la ïoh ïa ka jylla Meghalaya,” u la bynrap.