Ka jingshna ïa ka surok Shillong-Dawki ka la long kaba ïaid beit bad kaba bha, pyntip u Bah Tynsong

Shillong, Jylliew 15: U Symbud Myntri Rangbah ka jylla bad uba long ruh u Myntri ba khmih ïa ka tnat PWD (Roads) u Bah Prestone Tynsong u la pyntip ba ki jingïaid jong ka kam ha kaba ïadei bad ka jingshna ïa ka surok Shillong-Dawki ka la long kaba ïaid beit bad ki kam ki jam ki la long kiba bha.
U la ong ba kane ka jingshna ïa kane ka surok ar mala kan sa sdang noh shen kaba dei ruh kum shi bynta na ka surok kaba lah ban ïaid kumba 4 tylli ki kali ne ka four lane road kaba hab hapoh ka bhah package-I.
“Ka sorkar pdeng ka la mynjur ban pynïar ïa kane ka surok shaduh Barik point ha ka jaka na Anjalee petrol pump,” ïathuh u Bah Tynsong.
U Bah Tynsong u la pynpaw ruh ïa ka jingsngew hun haba ïadei bad ka jingïaid jong ka kam kaba ïadei bad ka package-II, IV bad V laitnoh ka package-III kaba la tip kum ka Pynursla bypass.
“Ha kaba ïadei bad ka package-III, mynta ka sorkar pdeng lyngba ka ministry of road of transport ka dang don ha ka lynti ban pynlait ïa ka pisa na ka bynta ban siew ïa ka bailutksan ïa ki kam jaka, nangta ki bynta jong ka jingshim jaka sha ka sorkar jylla khnang ba kan lah ban ai ne sam ïa ka bai lutksan sha baroh ki trai jaka,” u la bynrap.
Ïa kane ka road project la bei tyngka da ka Japanese International Cooperation Agency (JICA) ha ka jinglut kaba la mang T. 1187.5 klur, kaba kynthup ïa ka bai shim jaka ha kaba ka jinglut jong baroh kawei ka projek la mang ba kan lut kumba T. 1377.5 klur.
Ha kaba ïadei pat bad ka jinglong jingman jong ka Shillong Western Bypass, u Bah Tynsong u la pyntip ba baroh lai tylli ki package jong kane ka project ki la ïaid bha bad ki kam ruh ki la long kiba la ïaid beit ïaid ryntih.
“Nga sngewkmen ban ïohi ba ka kam ba ki la shim ka la long kaba la ïaid beit bad nga thikna ba kin lah ban pyndep ha ka por kumba la buh, bad ïa kane ka project yn lah ban pyndep ruh ha ka por kumba la khmih lynti,” u la ong.
Haba kylli u Symbud Myntri Rangbah u la ong, “Haoid ha kaba ïadei bad ki katto katne ki jaka kiba donkam ban pynheh bad pynïar ki don hynrei ïa kane ka kam na ka liang jong ki district collector ka Ri Bhoi bad East Khasi Hills ki la trei la ka kam ban khmih ïa ki jingdon ki trai kiba kam ïa ki jaka bad ngi dang trei la ka kam ban pynthikna ba ka jingsiew ïa ka bai khyndew kan dei ban poi sha ki trai kiba dei hok ban ïoh.”