Ka jingshim rai jong ka AKMTA kan ktah kylla ïa kiba kamai kali ha ka jylla, ong u Bah Paul

Shillong, Nailur 06: U Myntri ka sorkar jylla uba khmih ïa ka tnat ki kam jngohkai pyrthei u Bah Paul Lyngdoh ha ka sngi Saitjaiñ u la pynpaw ïa ka jingsngewkhia halor ka jingshim rai ba dang shen jong ka All Khasi Meghalaya Tourist Taxi Association (AKMTA) ban pynlong ïa ka jingïakhih ban pyrshah ïa ki kali kiba nabar ka jylla ban leit rung sha ki jaka jngohkai kiba don ha Meghalaya namar ka lah ban pynmih ïa ka jingleh pyrshah lang na ka Assam ruh.
Ha kaba ïadei bad kane na ka liang jong u, u la ong ba ka long kaba donkam ban long kiba phikir bha bad ban don ka jingïakren ban pynbeit halor kane ka mat.
Na ka liang jong u Myntri u ula ong ba ka Association na Assam ka la byrngem kylla ban pynjari lang ïa katei ka juh ka kyndon pyrkhing ïa ki kali kamai na Meghalaya.
U la ong, “Ngi lah ïohi ïa ka jingbyrngem lang na ka Association na Assam ha kaba kila pynpaw ba lada ïa ki kali jong ki la khang ban rung sha ki jaka jngohkai ha Meghalaya, kumta ki ruh kin leh lang kumjuh.”
Na ka liang ong u Bah Paul u la kyntu ïa ka AKMTTA ban ïadonbynta lang ha ka ban ïakren bad ka committee kaba la khlieh da u Bah Cyril Diengdoh ban pynbeit ïa katei ka mat.
U la ong, “Ngi lah ai jingmut ba kin ïakynduh ïa ka committee. Ki lah ïakynduh man la ka por, hynrei ngam lah pat ban sngewthuh kumno kim shim la lah ban pynbeit ïa katei ka mat.”
U la ong ruh ba Ïa ka jingïakajia hapdeng ki nongñiah kali hapdeng ka Meghalaya bad Assam dei ban pynbeit lyngba ka jingïakren hapdeng jong ki bad ki seng bapher bapher. Hynrei kila kwah ban pynlong ïa ka jingïakhih, bad la sngewthuh bha ïa kata ba ka lah ban mih ka jingshim sienjam ban pynphai kylla na ka liang Assam.