Ka jingshim rai ban pynlong ïa ka jingïalang Academic Council ka dei kaba beaiñ, ong u VC NEHU

By Mawphor Editor On May 20, 2025

Shillong, Jymmang 19: U Vice Chancellor ka North Eastern Hill University (NEHU) u Prof Prabha Shankar Shukla u la maham tyngeh ban leh da ki kam lada ka Pro Vice Chancellor Prof Sherwin Sungoh ka rai ban pynlong ïa ka Academic Council meeting ha ka 21 tarik mynta u bnai.
Katkum ka jingong jong u, kane ka jingpynlong ïa ka Academic Council meeting kadei kaba beaiñ naba kan ktah ïa ka jingïoh degree jong ki samla pule.
“Kane ka rai ban pynlong ïa ka jingïalang kan wanrah shuh shuh ïa ka jingkulmar bad kan ktah ruh ïa ka lawei jong ki hajar ngut ki samla pule. Lada pynlong ïa kane ka jingïalang ha ka 21 tarik mynta u bnai yn hap ban shim da ka kam kaba tyngeh,” maham u Prof Shukla.
Haba ong ba ka rai jong ka Prof Sherwin kum kaba beaiñ, u la kynnoh ba ka Prof Sungoh ka la rai hi ban long kum ka in-charge VC hapoh ka jingpynbor jong ka NEHUTA.
Kham ha shwa u Prof Shukla u la bthah ïa u Joint Registrar ban pynmih ka jingpynbna ban pynsangeh shwa ïa ka jingïalang ka Academic Council, hynrei na ka liang u Joint Registrar u khlem jubab ïa kane ka jingbthah.
Halor kane na ka liang u Registrar Col Omkar Singh (Retd) u la pynmih ka jingpynbna ban pynlong ïa ka jingïalang ha ka 23 tarik mynta u bnai, kaba ïaid ruh katkum ka administrative protocol.
“Wat hapdeng kane na ka liang ka Prof Sungoh ka la pynmih la ka jong ka jingpynbna lyngba u Joint Registrar ban pynlong ïa kane ka jingïalang arsngi shwa ka 21 tarik mynta u bnai ha kaba kane ka ktah ïa ki kyndon jong ka university, kaba ong ba tang u Vice Chancellor u don ka bor ban khot ïa ka jingïalang ka Academic Council,” ong u Prof Shukla.
Shuh shuh u Prof Shukla u la ong ba ka jingktah jong kane ka jingleh ka lah ban saphriang shabar ki sawdong sawkun jong ka university, naba ka NEHU ka don ïa kiba bun ki college ha Meghalaya bad ki jylla ba marjan kiba la pynïasoh bad ka.
“Kiba bun ki principal jong ki College ki la pynpaw ïa ki jingsngewkhia ha kaba ïadei bad ki jingmih ki jingkulmar naba ka la ktah ïa ki samla pule bad kumjuh ruh ki nongtrei. Uwei na ki principal, khlem da jer kyrteng u la ong ba lada slem ka jingai degree ne katba dang don kine ki jingjia, ki college kin hap ban jubab sha ki kmie ki kpa, ki samla pule bad sha ka sorkar, watla kim don bynta bad ki rai jong ka university,” u la bynrap.