Ka jingshah rem ka NPP ha ka Lok Sabha ka dei na ka State Reservation Policy ym na ka daw ka BJP, ong u Dr Kharlukhi

Shillong, Jylliew 20: U MP ba marwei ka Rajya Sabha u Dr WR Kharlukhi ha ka sngi Palei u la ong ba ka daw kaba kongsan shalyndet ka jingshah rem ka National People’s Party (NPP) ha ka Lok Sabha Election ba dang shudep na Tura bad Shillong seat ka dei namar ka “state reservation policy” bad ym dei na ka daw ka jingkyrshan jong ka BJP.
U la ong ba kan bha ïa ka party ban rem ha ka election na ka bynta ka jingdonkam ka jingïalong kawei jong ka jylla.
U State President barim ka NPP u la maham ruh ba ka dei ka dak kaba sniew na ka bynta ka jylla lada ïa ki election la jop na ka daw ka jingshah thngan ba dawa ban khmih biang ïa ka bhah thungkam thungjam ne ka job reservation policy.
Haba kren sha ki lad pathai khubor U Bah Kharlukhi u la ong ba ka NPP ka la ïakhun bad ka lyer jong ka Voice of the People Party (VPP) ha Khasi-Jaiñtia Hills bad ka lyer jong ka Congress ha thaiñ Garo Hills ha kine ki Lok Sabha election ba dang shudep.
“Ha baroh artylli ki lyer ngi la rem namar jong ka state reservation policy. Sha kane ka liang jong ka Khasi-Jaiñtia Hills, ki kwah ka jingkhmih biang bad ki peit sha ngi kumba ngi long kiba pyrshah bad sha ka liang jong ka thaiñ Garo Hills, kim kwah ban khmih biang bad ki peit ïa u Myntri Rangbah kum uba kwah ban pynbiang ïa ka jingdonkam jong ka Khasi Hills,” u la bynrap da kaba ong, “Hynrei nga ai ka jingïaroh shisha ïa u Myntri Rangbah naba ki don ki por ha ki kam saiñ pyrthei, na ka daw ka jingïatylli jong ka jylla, kan kham bha ba ngi rem ha ka election hynrei kum u statesman, phi hap ban rai kaei kaba dei.”
“Ha ka por ba jur bha kane ka jingïakhih kaei kaba u Myntri Rangbah u la leh, u la khot ka jingïalang bad u la hap ban mynjur ban khmih biang namar ha ka jingïohi jong u, haoid satang da kane ka lynti bad nga tharai ka la ktah ïa u sha kawei ka liang bad ka la ktah pat ïa sha kane ka liang,” u la ong.
U Bah Kharlukhi shuh shuh u la bynrap, “Lada ïa kane ka election la jop lyngba ka saiñ pyrthei kaba khuid ne clean politics, haoid ka dei kaba bha. Nga kren sha kane ka liang Khasi Jaiñtia Hills, bad nga khlem kren sha ka liang ka Garo Hills. Hynrei lada ïa ka election la jop namar ka jingshong shah thngan ban khmih biang ïa ka reservation policy, nga ong ïaphi ba dei ka dak kaba sniew bad ymdei ban khuslai namar ngin sa ïoh kheit biang ïa u soh bad nga tharai ngi dang ïaibteng ban im ban ïohi ïa ki soh jong ka jingtrei shitom. Kane kadei ka jingïohi jong nga. Ka Clean politics haiod, nga tharai ka la dei ka por ba ki briew kim dei ban shim pisa ha ka por election ka dei ruh kaba bha, hynrei lada ka long da kawei pat ka lynti ka long ka dak kaba sniew na ka bynta ka jylla.”
Haba kylli, u MP ka Rajya Sabha u la ong ba katkum ka jingïohi jong u ka NPP ka khlem rem namar ka rai kyrshan ba pura jong ka BJP ïa ka party.
“Katkum ka jingïohi bad jingkheiñ jong nga kam dei ba ka BJP ka kyrshan ïa ngi. Ngam ngeit ïa kata. Balei nga ong namar ha u snem 2016 ym tang ka BJP kaba kyrshan ïa ngi wat u tribal affairs minister u leit ïalap election bad nga, bad u Myntri Rangbah u la jop la jan 2 lak bad u la pynkheiñ ïa ka record ha Garo Hills,” u la bynrap.