Ka jingshah pynjulor ha ki bor ka mariang hato ka dei ka jingleh bum suidñiew hi jong u khun briew?

Ha kine ki khyndiat sngi ba la leit noh la ïohi ïa ka jingther u lapbah lapsan uba jur bad don ki jaka ba wan lang bad ka eriong ha kaba kiba bun ki ïing ki la shah pynjulor, ki dieng ki siej kiba khyllem, ki surok kiba shah rong ha ka um, ki jingshah rong ki jingkieng, ki jingtwa khyndew ha kiba bun ki jaka ba la wanrah ruh ka jingduh ki mynsiem briew. Hynrei ka jingkylli kaba ha khmat jong kine kiei kiei hato kam dei ba u khun bynriew u khlem ri khlem sumar shuh ïa ka mariang ba sa jia kine ki ei kiei baroh.
Hato ki jingthwa ki surok, ki ïing ki sem, ki jingshlei um kine kim dei mo ka daw jong u khun bynriew hi namar ba la jur than ka jingpynjulor ïa ka mariang. Naduh ka jingpom ïa ki dieng ki siej, ka jingtih maw, ka jingpynkhapngiah ïa ki wah ha sor da ki jingtei ïing naduh wah, ki jingtih dewiong, jingtih mawshun bad ter ter. Ka jingtwa ka khyndew kam dei mo ba ym don shuh ki thied dieng kiba bat skhem ïa ka khyndew ba haba la synjor na ka jingtih maw ne jingbym don shuh ki dieng ki siej tang shu la wan u lapbah, la syntuid beit na sharing lum sha ki surok.
Hooid ka sorkar na ka por sha ka por ka ju ïalap bad pynshai sha ki paidbah ïa kajingdonkam ban ri bad sumar ïa ka mariang, hynrei ym don ba sngap satia namar la shu pom pathar palat ïa ki dieng ki siej. Mynshwa ha ki jaka ba rben bha ki khlaw kum sha Lyngngam ba ki ong hyndai, la ïathuh tang ban ïaid ruh ym ïohi satia hap rah bad ka tourchlight mynsngi mynshai ruh. Hynrei lada leit sha kito ki jaka mynta la ïohi ba la syllen lut bad la ñiar bha ki dieng ki siej bad ki khlaw ki btap. Kane ka jingpynjulor ïa ka mariang teng teng ba pynkhie bitar ïa ka mariang bad sa jia kine kiei kiei baroh.
Lada ngi kwah ba ka mariang kan ïa im ryngkat ryngkat bad ngi ki briew, kaba donkam ka long ba ngin kyndit bynriew noh bad ba ngin ri bad sumar ïa ka mariang ha ki liang baroh. Kam myntoi ban ïa ieit mariang tang ha ka environment day da kaba thung dieng shisien shisnem hynrei kaba donkam ka long ban ïai sumar lynter ïa ka mariang khnang ba kan long ym tang ka jingpynitynnad ïa ka mariang hynrei kan long ka jingmyntoi ïa ngi bad ïa ki longdien jong ngi namar lada jia kumba long mynta , mynta ngi dang hap ban thied um ban dih da ki bilor namar ym nud shuh ban ïadih na ki umkor lada ym ïoh bha ban shet ne filter ïa ka um kaba ma ka long lada ïai pynjot ïa ka mariang ïoh kan poi ka por ba ngin hap ban kieng sa ki tyndong lyer oxygen ha ka met jongngi namar ka lyer kam long shuh ban ring mynsiem. Kynmaw shwa ban jia kine kiei kiei baroh to ngin long kiba phikir bad sumar ïa ka mariang na ka bynta ka jingmyntoi ïa ka lawei bad patneng ban dang wan.
Namar kam myntoi ban pyrta tang ka sorkar hynrei ka donkam ïa baroh ban ïasnoh kti lang na ka bynta kane ka kam. Ai ba ngin sdang na la ïing la sem ban sumar ïa ka mariang da kaba ym bret pathar ïa ki niut ki ner ne ki plastic, da kaba ym pom pathar ïa ki dieng ki siej. Nalor kata haba tih maw ruh dei ban don la u pud ym ban shu tih lut naduh maw, mawshun, dewiong bad shalan lut shabar ka jylla khlem da pyrkhat pat aiu ka pateng ban dang wan kan dang ïoh ha kane ka jylla.