Shillong, Naitung 23: Ki pulit ka jylla ki la khot hajir biang ïa ki nongïalam jong ka KSU Malki Circle ha kaba ïadei bad ka jingkhynra ïa ki bar jylla ki bym biang ïa ki kot ki sla kaba ïadei ruh bad ka kam work permit.
Haba kren sha ki lad pathai khubor na ka liang u samla Ïashan Mukhim President ka Malki Circle u la pynpaw ka jingsngewkhia halor ka jingkren jong u Myntri Rangbah ka jylla u Conrad Sangma uba la ong ba kam don satia ka Work Permit ha kane ka jylla bad ong ba kane ka jingkren u Myntri Rangbah ka la pynshlur pynban ïa ki bar jylla ban wan seng kam sha kane ka jylla.
U la ong ba kane ka jingkren jong u Myntri Rangbah bym don work Permit kan ai lad ïa ki bar jylla ban wan sengkam bad kane ka pynshlur ïa ki bar jylla ban leh ruh ïa ki kam beaiñ khlem da bud ïa ki kyndon jong ka sorkar ne ka KHADC bad kumjuh ruh ïa ki kyndon jong ki dorbar shnong.
Ha kaba ïadei bad kane ka jingshah khot hajir u la ong ba kane kam pynsmeij pyntieng ïa ka seng bad kane kan nang ai mynsiem shuh shuh ïa ka seng ba kan nangtrei shitom na ka bynta ka daw bah jong ka ri bad ka jaitbynriew. U la ong ruh ba ka tnat pulit lyngba ka Sirdar Police Station ka la khot hajir pat sa ïa u Samla Andrew Gary Dkhar uba dei u General Secrtetary jong ka KSU Malki Circle.
