Ka jingset tulop ym tangba ka long be aiñ hynrei dei ka jingleh bymhok-Ong i Kong Angela

Shillong, Naitung, 19: Ka Convenor jong ka Thma u Rangli Juki (TUR) ka Kong Angela Rngad ha ka sngi Baar ka la sangah tyngeh ïa ka Sorkar Meghalaya Democratic Alliance (MDA) halor ka jingbym siew tulop jin san bnai kynthih ïa ki nonghikai skul SSA, kata, naduh u bnai Rymphang haduh u bnai Jylliew, 2022.
Da ki spah ngut ki nonghikai skul SSA kiba la ïashim bynta ha ka jingïakhih kaba khlem pud sngi ki la sahmiet ha Parking Lot kaba don markhap bad ka ophis Additional Secretariat, Shillong kum ka jingpyrshah ïa ka jingset tulop ka Sorkar haduh san bnai kynthih.
Ha ka lah sngi u Blei mynta ka taiew, u Additional Chief Secretary ka Sorkar Jylla u Bah Donald P. Wahlang uba peit ïa ka tnat Pule Puthi u la khot ïakren ïa ki nongïalam jong ka Meghalaya SSA School Association (MSSASA) bad ïa ki nongïalam jong ka All Meghalaya SSA School Teachers Association (AMSSASTA) ban pyntip ba ka jingtip bym pat lah ka Sorkar Jylla ban siew ïa ka tulop ka dei na ka daw ka jingbym pat pyllait ka Sorkar Pdeng ïa ka bhah pisa sha ka Jylla Meghalaya.
“Ka jingwanrah ïa ka skhim SSA ka long ban kyntiew ïa ka pule puthi sha ki shnong nongkyndong hynrei ka long kaba sngewsih ha ka jylla jong ngi ka pulom lut tang na ka daw ba ki (Sorkar) theh umpjah ïa kito kiba la theh umsyep ban kyntiew ïa u budlum jong ka pule puthi, kita ki dei ki nonghikai,” ong ka Angela Rngad haba ïakren bad u Mawphor ha ka jingleit jngoh ïa ki nonghikai SSA kiba sah miet ha Parking Lot.
Ka la pynkynmaw ruh ba dang shen ki nonghikai skul Adhoc kiba don hapoh ka shatri jong ka Federation of All School Teachers of Meghalaya (FASToM) ki la pynlong ïa ka jingïakhih da kaba sahmiet ha kane kajuh ka Parking Lot ha kaba ki la hap ban shu pynkut noh ïa ka jingïakhih namarba ki don ka jingsngewkhia ïa ki khynnah skul watla ka Sorkar kam shym la lah ban pynurlong katkum ka jingdawa jong ki.
“Mynta pat sa ïa ki nonghikai SSA ki shah set tulop katne phew bnai phi mutdur kumno kin pynim ïa la ki khun ki kti bad ïa ka ing ka sem. Kane ka jingset tulop ym tangba ka long kaba be-aiñ hynrei ka dei ruh ka jingleh bym hok namarba ka Sorkar hi ka bym lah ban peit ïa ka bha ka miat jong ki nongtrei nongbylla ha la ka jylla lajong ka dei ka Sorkar kaba la phiel lypa,” la kynthoh ka Kong Angela Rngad.
“Kane ka jingbym lah pynbiang (ïa ka tulop sha ki nonghikai) ka don ka jingpyndonkam bakla da ki klur ka pisa ha kane ka Sorkar. Ki shu leh myn ong ba kam wan ka pisa na Delhi. Ngi hap ban buh jingkylli balei, hato lehse ka dei ba kim lah ban pynbiang ïa ki kot ki sla ne ki Utilization Certificate nangne?” la buh buh jingkylli kane ka Convenor jong ka TUR bad bynrap, “kam don ka jingai jingkheiñ kaba shai hangne. Namarkata, ïa ka jingbahkhlieh dei ban shim naduh u Myntri ka Tnat Pule Puthi haduh ki heh Ophisar shaduh kiba dei ban khmih ha ka tnat Pule Puthi baroh kawei.
“Ka jingeh mynta ka wan hap ha ki nonghikai namarba ka Sorkar kam lah ban treikam. Ngi kum ki nongshong shnong ngim lah ban pdang ïa kata. Ka jingdawa jong kine ki nonghikai ka long kaba shongnia. Haba phi (Sorkar) set ïa ka bhah jong ki briew kiba ladep trei ïa ka kam ka dei ka hok jong ki ban dawa. Lada ki ki set tulop leilei kumne nga sngew ban ong ba dei ban siew wat ïa ka sut namarbar haba phi set ïa ka tulop jong ki briew, ki hap ban leit shim da ka ram nangne nangtai bad ki hap ban wadlad kumno ban im,” ka la ong.
Shuh shuh ka la ong ba ka jingdawa jong ki nonghikai skul SSA ban pynkiew tulop bad ka jingdawa ban siew ïa ka Arrear jong u snem 2016 ka long kaba shongnia. “Ka jingbym lah ban pynurlong ïa kine ki jingdawa ka kdew kim (Sorkar) don ka mon ban peit bad ban pynbeit ïa ka jingeh jong ki paidbah bad khamtam ïa kane ka jingeh ki nonghkai,” la bynrap ka Kong Angela.
Haba kynthoh ïa ka jinghiar arsut ka pule ka puthi ha Meghalaya, ka la ong, “mynta ka kynti leilei ngi ïohi ba ka Meghalaya katkum ka Performance, Infrastructure and Equity (PIE) Index 2020-21 ka la wan sha trai bad ka daw ka long ba ka Sorkar kam lah ban kyrshan ïa ki nonghikai. Bunsien haba ki wan ki bhah jingïarap ki (Sorkar) kham theh sha ki jingtei. Ha,oid, ngi donkam ïa ki jingtei, hynrei bunsien ki (Sorkar) kloi ban trei ïa kata namar lehse hangta kaba suk bha ban ïoh bam klop.”
“Lada ngi kwah ban kyntiew ïa ka pule ka puthi, nyngkong eh ban pynbiang ïa ka bha ka miat jong ki nonghkai bad nangta kin sa lah ban ai ïa kaba bha tam sha ki khynnah skul,” ka la ong.
“Kum kine ki jingïakhih kin dang ïai mih shi ïai mih lada phi (Sorkar) knieh noh ïa ki hok bad phi (Sorkar) khñiot beiñ ïa ki nongtrei nongbylla,” la bynrap.
Kane ka nongïalam jong ka TUR ka la ai mynsiem ruh ïa ki nonghikai SSA ba kin ym kynran dien katba ka jingdawa jong ki kam pat urlong.
ïam Pangnud u Nonghikai: Napdeng ki nongmihkhmat paidbah kiba la leit jngoh ïa ki nonghikai mynta ka sngi, ki kynthup ruh ïa u Bah George B. Lyngdoh, MLA jong ka Umroi. Ha kane ka jingleit jngoh u Bah George u la ïakren bad ki nonghikai bad dei ha kane ka jingleit ïakren bad ki, ba uwei u nonghikai u la ïam pangnud hakhmat u MLA da kaba dem ruh ha ka shadem jong u. Na ka liang u MLA, u la kdup kylla ïa u ban pyntngen bad ai mynsiem ïa u ha kaba kum kane ka por ba ki nonghikai ki ïakynduh ïa ki jingeh bad mad ruh ïa ka jingshah ban beiñ ha ki bor sorkar.