Ka jingsahteng ka Traditional & Cultural Centre ka dei na ka hukum ka High Court: Teibor Pathaw

Shillong, Lber, 23: U Executive Member i/c Building jong ka Khasi Hills Autonomous District Council (KHADC) u Bah Teiborlang Pathaw ha ka sngi Balang u la ong ba ki jingkynnoh jong ka Hynñiewtrep National Youth Front (HNYF) East Khasi Hills District Unit dang shen halor ka jingshna ïa ka shlem tynrai lane ka Traditional and Cultural Centre ha Jingkieng Kalong, ka long ka bym shongnia haei haei ruh em.
Ha ka jingïakren bad ki lad pathai khubor u Bah Teiborlang Pathaw u la pynshai ba ka jingsahteng jong ka kam haduh mynta ka dei na ka daw ba ka Ingbishar Meghalaya High Court ka la phah pynsangeh ïa kane ka jingshna namarba ka don hajan ka pung umïam kaba lah ban pynjaboh ïa ka um.
U la pynshai ruh ba kane ka jaka ka dei ka nongkynti jong ka District Council bad ka jingshna ïa kane ka shlem tynrai ka long hadien ba ka Monolith Festival kaba la long ha madan lyngktop ha ka shnong Mawphlang ha u snem 2017 ka la long kaba jop. “Dei na kata ka daw ba ka Council ka la pyrkhat ban shna noh ïa ka Traditional and Cultural Centre kaba neh shi junom khnang ba kan long ka lad aikam aijam ïa ki trai muluk,” u la ong.
U la ong ruh ba ka Council ka ladep aiti ruh ïa baroh ki kot ki sla ha ka jubab RTI ba la pan da ka HYNF. “Hynrei ka long pat kaba sngewlyngngoh ba ka HNYF ka la shu kynnoh khlem da pynshong nongrim bha ïa kaei kaba ngi ladep ai jubab lut baroh ha ka RTI bad ïa kaei kaba ki lap ha ka jingleit jurip dang shen,” u la ong.
U la ïathuh ba ka jingshna ïa kane ka shlem tynrai la sdang da ka Executive Committee kaba rim ha u snem 2017 bad ïa ka Work Order la aiti ha u snem 2018.
Ha kaba ïadei bad ka jingkynnoh jong ka HNYF ba la shu pynsyrwa kai ïa ka pisa haduh T. 3 klur tang ha kaba maramot ïa ka surok lynti rim, u Bah Teibor u la ong, “hadien ba la ïoh ïa ka No Objecttion Certificate (NoC) na ka tnat PWD, namarba ka dei ka surok kaba la shna naduh ka por ki Phareng ka surok ka la jot bha bad ha u snem 2019 ngi la aiti ïa ka Work Order ban shna pynbha ïa ka surok. Hynrei ynda ngi la leit sorjamin, ngi lap ba la donkam ruh ban shna ïa ki kynroh, ki nala, ban thep ruh ïa ki pipe um kiba heh bad ka jingshna ka la long kaba bun jaka. Tang T.3 klur kam dei satia ban shna ïa ka surok. Ki nongïalam ka HNYF kim shym la peit bha ïa kito ki jingshna katkum ba la ai jubab ha ka RTI ha ka por ba ki la leit jurip.”
Shuh shuh u la ïathuh ba ka pisa kaba la ai sha ki arngut ki Contractor kiba kynthup ïa ka Rodeka Enterprise bad sha u Bah A. Lyngdoh ki dei tang ki Running Bill bad ka jingtrei haduh mynta ka dang sah bad lada ym dei ba pynthud ka khlam COVID-19 bad ka jingpynsangeh shipor da ka Meghalaya High Court, katta ka jingtrei ka ladep.
Haba kyllli, u la pyntip ba ha u snem 2019 ynda ka jingtrei ka la ïaid shakhmat ka Council ka la siew ïa ka pisa sha ki Contractor.
“Ka Bill kaba la siew naduh u snem 2018 ka dei tang ka Mobilisation Bill bad hadien kata ngim shym la pyllait shuh ïa ka pisa katba ïa ka kam ym pat dep,” u la ong bad bynrap, “ka projek kaba la mang ka long T.12.50 klur katba na ka T.7.50 klur ka pisa kaba dang sah ka long sa T.1.63 klur bad ka Bill ba la pyllait sha ki Contractor ka long T.4.87 klur.”
U la kynthoh tyngeh ruh ïa ka HNYF da kaba ong, “haba ngi ladei aiti lut ïa ki kot ki sla ban shu kynthoh madei mata ka dei kaba bym lah long satia. Ka jingkynnoh ba ha ka Executive Committee ngin shu ïakren tang ïa ka pisa ka bym lah ban long. Mano lehse ba don lang na ka HNYF ha ka por ba ngi shong ïa ka Executive Commitee?” la kynthoh une u EM ka Council.
“Kumno yn shu kynthoh ba ngi pyndonkam bakla ïa ka pisa na ka bynta ka elekshon? Ka HNYF ka dei ban da peit bha shwa ban shu kynnoh ym ban shu kren ruma,” u la ong.