Ka jingrem ne jingjop ka Congress ha kiwei ki jylla kan nym ktah ha Meghalaya: PN Syiem

Shillong, Nohprah 08: U Working President ka Meghalaya Pradesh Congress Committee u Bah Pynshngaiñ N Syiem u la ong ba ka jingjop ka Congress ha Himachal Pradesh ne ka jingrem jong ka ha Gujarat kan ym don jingïadei eiei bad ka jingjop ne rem ka Congress ha ka jylla ha ka elekshon MLA ban wan ha u snem 2023.
Haba kren bad ki lad pathai khubor u Bah Pynshngaiñ Syiem u la ong ba ka rukom ïakhun elekshon ha ka jylla ka ïapher bak lybak bad kiwei ki jylla bad ka jingrem ne jop ka party sha kiwei ki jylla ruh kan ym don jingïadei eiei bad ka jylla namar ka elekshon ha ka jylla ka pher na kawei sha kawei pat.
“Ngim dei ban sngewthuh bakla ba tangba ka rem ka Congress ha Gujarat kan rem lut sha kiwei ki jylla, peit ha Himachal Pradesh kaba ki ñiew vote lang ha kajuh ka sngi bad ka Gujarat ka party ka jop bad kan ïoh thaw sorkar ruh bad kan long kumjuh ruh ba kaei kaban jia ha ka jylla ïa ka party kan ym ïasoh eiei bad kaba jia sha kiwei pat ki jylla namar ki mat bad ki jingïakhun ruh kin pher bad ki nongïalam ruh,” u la ong.
“Khlem pep wat la kam don jingïasnoh bad kaei kaba jia sha kiwei ki jylla hynrei na kaei kaba la mih na Himachal pradesh kan ai mynsiem shi katdei ïa ngi hangne ruh,” u la bynrap.
Haba la kylli halor ka jingpynkhreh jong ka party ïa ka elekshon ha ka jylla, u Bah Pynshngaiñ Syiem u la ïathuh ba ka party ka long kaba la pynkreh bha ban ïakhun ïa kane ka elekshon ban wan.
U la ïathuh ruh ba kumba long mynta ka party ka don ka jingthmu ban ïakhun lut na baroh 60 tylli ki seat bad kiba ka la dep ïoh ïa ki kyrtong ka la jan kot sha ka 40 tylli.
Haba la kylli la ka party kan don ka jingïatehlok shuwa bad kiwei ki seng saiñ pyrthei shuwa ka elekshon, u Bah Pynshnaiñ u la ïathuh ba ka party kan leit marwei sha ka elekshon bad lada dei ba donkam ïatehlok kan dei beit tang ynda la dep ka elekshon.
Haba kylli la ka jingwan pat ka AITC ha ka jylla kan don jingktah ne em ïa ka party ha ka elekshon, “Kam don ka jingktah kaba haduh katta katta hynrei kan ai jingmyntoi pynban ïa ka party wat la lehse kan don jingktah ha ki katto katne ki bynta ka Garo Hills namar ka jigmih noh u Dr Mukul,” u la ong.
U la ong ruh ba wat la u Dr Mukul u la mih noh hynrei ka party ka dang don da kwei pat ki nongïalam ha Garo Hills kum ka Deborah Marak bad kiwei de.
Shuh shuh u la ong ruh ba ka elekshon ha ka jylla kan dei hapdeng ka Congress bad kiwei pat ki seng lait noh ka BJP namar kumba long haduh mynta ki paidbah kim pat pdiang satia ïa ka BJP ha ka jylla.
“Ka jingbun ki seng riewlum ha ki bynta ka Khasi Jaintia kan don jingmyntoi bah ïa ka party ha kine ki lum bad sa ka jingwan ka TMC ruh
Haba la kylli haduh katno u ïohi ba ka don ka kabu ïa ka party ha kane ka elekshon ban wan, u Bah pynshngaiñ u la ong ba ki paidbah ki la lap ïa ka jingsohsat ha ka jingsynshar kiwei ki party ha kie ki san snem bad bun ki la sngew thngad bad kiba bun hi ki kwah ban ailad biang noh ïa ka Congress.
Haba u Mawphor u ïakren bad u President ka BJP Meghalaya u Bah Earnest Mawrie u la ong ba ka jingjop ka party ha Gujarat ka la long ka jingai mynsiem ïa ka party bad ïathuh ruh ba na ka liang ki nongïalam na Delhi ki la sdang shait shait ban ïakhun sa ïa kiwei ki elekshon kaba kynthup ïa ka jylla jong ngi ruh.
“Dang mynta hi ki nongïalam ki la khot ïa ngi sha Delhi ban ïa pyrkhat ïa ka elekshon ha ka jylla bad na kaei kaba nga ïohsngew ka long ba ki paidbah ki la angnud ki la kwah ba ka BJP kan synshar ïa ka jylla bad don noh da ka Double Engine Government ne ka sorkar ba synshar ha jylla bad ha Delhi da ka BJP khnang ba ki kam pynroi ki tuid sha ka jylla na bynta ki nongshong shnong hi,” u la ong.