Shillong Lber 09: Katba ki briew kylleng ka pyrthei ki rakhe ïa ka International Women’s Day man ka 8 tarik u Lber, ka jingphai khmat ka long sha ki longkmie kiba long ki nongïalam ban wanrah ïa ka jingkylla. Haba ithuh ïa ki longkmie ha ka jinglong nongïalam ka long kaba kongsan, ka long ruh kaba kongsan ban pyni ïa kito ki jingkylla ha ka imlang sahlang, kaba plie lad bad ai mynsiem ïa kiwei lyngba ka jingaiti jong ki.
Ha West Jaiñtia Hills Distrik jong ka jylla Meghalaya, ka Kong Bina Sungoh, Secretary jong ka Village Employment Council (VEC) ha Khlieh rangnah, kadei napdeng ki longkmie nongìalam ba bun ha kaba ki jingnoh synniang jong ki ka la kyntiew ïa ka jingkylla ha ki jaka nongkyndong lyngba ki sienjam kamai kajih kiba ïaineh. Lyngba ka jingïalam ba khlaiñ jong ka, ka la rah shakhmat ïa ki prokram bapher bapher ba ïadei bad ka roi ka par, khamtam ka jingpynïasoh ïa ka MGNREGS bad ki sienjam kiba lait na ka NRM. Ki sienjam jong ka ban pynïasoh ïa ka MGNREGS bad ki sienjam ba ïadei bad ka rep ka riang ki la plie kiwei pat ki lad kiba lait na ki kam kiba ïadei bad u dewïong, ka la kyntiew ka jingskhem ka ïoh ka kot na ka bynta ki nongshong shnong jong ka thaiñ.
Ka Kong Bina Sungoh ka la shimti kum ka Secretary jong ka Village Employment Council naduh 15 tarik Jymmang 2021 haduh mynta. Ha shuwa kane, ka la long ka dkhot jong ka Executive Committee naduh u snem 2015 bad ka long ruh ka dkhot jong ka SHG & nongïalam jong ka kynhun naduh u snem 2016.
Ka Kong Bina ka la ïalam lynti ïa ka projek kaba thmu ban pynbha biang ïa ka jaka puta, pynkylla 20 hectare ka jaka ba shu ieh sha ka jaka rep kaba seisoh. Kane ka sienjam kadei shi bynta jong ka Aroma Mission, ka jingïatreilang hapdeng ka MGNREGS, ka Institute of Natural Resources Meghalaya, bad CSIR-CIMAP, Lucknow. Ka la kynthup lang ïa ki longkmie kiba don job card ha kane ka projek, pynshlur ïa ki ban pynlut ïa ki bainong jong ki ban thied 500 kilo ki jaka pynkhuid ban pynmih ïa ki umphniang ba donkam na u lemon grass, citronella, bad sla shynrai, da ka jingthmu ban kyntiew ïa ki karkhana barit ha ki jaka nongkyndong.
La shna ïa ka jaka treikam ban pynbiang ïa ka jinglong kaba shngaiñ na ka bynta ka kam pynkhuid. Hapoh shi snem shiteng, ka jingïalam jong ka Kong Bina ka la wanrah ïa ka jingkamai kaba T. 5.4 lak na ka jingdie ïa ki tynrai dieng bad ki umphniang. Kaba kham kongsan, ka plie lad ïoh kam ba skhem ïa kumba 50 tylli ki longiïng, ki nongtrei kiba dang kylla na ka bylla dewïong sha ka kam rep kaba ïaineh, ha kaba ki nongtrei ki nohsynniang 25 sngi ha ka shi snem.
Ka sienjam jong ka Kong Bina ym tangba ka la kyntiew ïa ka ïoh ka kot hynrei ka la pynbud ïa kane ha 16 tylli ki shnong ba marjan. Ha une u snem mang tyngka (2024-25), ka la pynïar shuh shuh ïa ka kam jong ka lyngba ki projek ba thymmai kum ki jaka thung syntiew bad ki jaka shna sboh, ka jingpynkylla ïa ki ñiut sha ki jingdon jingem ba kongsan lyngba ka MGNREGS. Ka jingaiti jong ka ban plie lad ïoh kam ka la ïalam ruh sha ka jingïadon bynta shitrhem ki self help group jong ki longkmie ban pynmih ïa ki umphniang na u lemon grass bad shynrai, lem bad ki mar kum ki sabon bad ki mar ba sma iwbih.
Ban kyntiew shuh shuh ka jingaiti jong ka sha ka jingkiew shaphrang bad ka jingpynkupbor, ka Kong Bina ka la ïashim bynta ha ka jingai jinghikai ha ka jingkyntiew ïa ka kam ba la seng dalade kaba ïadei bad ki umphniang, ki mar sma iwbih bad aromatherapy, ba la pynlong da ka CSIR-CIMAP, Lucknow, da kaba pynlut hi nalade. Mynta, ka bteng ban ai jinghikai ïa ki dkhot self help group ban shna ïa ki sla sha bad ki umphniang ba khleh, kaba la pynkupbor ïa ki longkmie hapoh shnong bad shabar ka shnong. Lyngba ki jingtrei shitom jong ka, ka Kong Bina Sungoh ka la pyni ba ka long ka nongïalam ba wanrah jingkylla, kyniew ïa ka rukom rep kaba ïaineh bad plie ka lawei ba phyrnai ïa ki nongshong shnong.
