Ka jingrah pateng ïa ka sharak kan pynshlur ïa ki samla ïalehkai Chess na ka thaiñ Shatei Lammihngi: DGP

Shillong, Naitung 10 : Ka jingrah pateng ïa ka sharak Chess Olympiad kaba nyngkong eh ka la poi ha nongbah Shillong, ha ka step jong ka sngi Saitjaiñ jong ka taïew ba lah dep hadien ka jingïaid lynti ha ki bynta bapher bapher jong ka ri. Ïa ka jingrah pateng ïa ka sharak la pyllait da u Myntri Rangbah duh jong ka ri, u Narendra Modi ha IG Stadium ha New Delhi ha ka 19 tarik Jylliew, 2022.
Katba ka India ka rakhe ïa ka snem ba 75 jong ka jingïoh jinglaitluid jong ka, ïa ka sharak Chess Olympiad la rah sha 75 tylli ki nongbah jong ka ri hashuwa ban poi ha Chennai, ka Nongbah kaba pynlong ïa ka 44th FIDE Chess Olympiad naduh ka 28 tarik Naitung haduh 10 tarik Nailar, 2022.
U Grand Master, Mitrba Guha u la wanrah ïa ka sharak bad aiti ïa ka sha u kongsan Dr LR Bishnoi, DGP jong ka Meghalaya. Ha ka jingai jingkren ha ka jingïalang, u Dr Bishnoi u la ong kalong ka burom kaba khraw ïa ka ri ban pynlong ïa ka Chess Olympiad namar ïa ka chess la ïalehkai ha jan baroh ki ri jong ka pyrthei.
“Nga la ïoh jingtip ba jan 187 tylli ki ri ki ïashim bynta ha kane ka Chess Olympiad, kumta kan long ka prokram kaba heh bha bad kan long ka jingïaiakhun hapdeng ki kynhun bapher bapher. Nga thikna ba bun ki Grand Master kin ïashim bynta ha ka Chess Olympiad bad kin wanrah nam bad burom sha ka ri.” U la pynpaw ka jingkyrmen jong u ba ka jingpynlong ïa ki prokram kum ka jingrah pateng ïa ka sharak kan pynshlur ïa ki samla ïalehkai chess.
Katba u Dr Bishnoi u la pdiang ruh ba ym don Grand Master na ka thaiñ Shatei Lam Mihngi, u la ong ba kine ki prokram kin ai mynsiem ïa ki samla ïalehkai ban long ki Grand Master na ka bynta ka ri, ha kaba u la ong, “Nga kyrmen da ka jingpynlong ïa kum kane ka prokram kan ai mynsiem ïa ki samla ïalehkai chess bad shen ngin lah ban ïohi katto katne ki grandmaster na Meghalaya bad kiwei kiwei ki bynta jong ka thaiñ shatei Lam Mihngi.”
“Da ka jingpynlong kum kine ki prokram nga thikna ba ka jingpawnam jong ka jingïalehkai chess kan sa kiew.” ong u Dr Bishnoi. U la pynkut ïa ka jingkren jong u da kaba ai ka jingkitbok kitrwiang jong u sha ka jingrah pateng ïa ka sharak bad sha u Mitrba Guha na ka bynta ka Olympiad.
Ha ka jingïalang la pyni ruh ïa ki video kyrwoh jong u Myntri Rangbah duh ka ri, u Narendra Modi bad u Myntri sorkar pdeng ba dei khmih ïa ki kam ïalehkai, u Anurag Thakur kiba la kyntu ïa ki khynnah ba kin sdang ban ïalehkai ïa ka chess.
Kum shi bynta ka jingrakhe, hynriew ngut ki nongïalehkai chess ba dang sdang ki la ïoh lad ban ïalehkai pyrshah ïa u Grand Master hakhmat ki nongpeitkai kiba bun ha Indoor Stadium SAI, STC, NEHU Campus, Shillong.
Ha kane ka jingïalang la ïadonlang ruh ki ophisar jong ka tnat kam ïalehkai, ka State Chess Association, Olympic Association, ki khynnah skul, ki nongïalehkai jong ka SAI Centre NEHU Campus, ki volunteer jong ka NYKS, ki briew kiba sngewtynnad ïa ka jingïalehkai Chess bad ki nongïalehkai chess ba dang sdang.
Ka jingrah pateng ïa ka sharak kan long sa sha Guwahati, hadien sha Arunachal Pradesh hashuwa ban leit sha Orissa bad kan poi khatduh sha Mahabalipuram.