K a sorkar jylla ka la rakhe ia ka World Tourism Day mynta ka sngi hangne ha nongbah Shillong haba la ïadon lang da U Myntri Rangbah ka jylla Meghalaya u Conrad K Sangma Dei ha kane ka jingrakhe ba u Myntri Rangbah, u Conrad K Sangma, u la pynpaw ba kala don shibun ka jingkylla ha ka liang jong ka kam jngohkai pyrthei ha kine ki khyndiat snem kiba la leit naduh ba ka sorkar kala shim ïa ka tnad tourism kum kawei na ki projek ba heh bad ba kongsan jongka jylla.
U la pynpaw ruh ba ka sorkar ka la shim ïa ki lad ki lynti kiba kongsan tam ha kane ka bynta ha kaba ïadei bad ka jingpynmih kam bad kumjuh ruh ha kaba ïadei bad ka jingïakhun kaba kum ka jylla ka don ha kane ka bynta. La sdang ban ïohi ïa ka jingkylla jong ki sienjam ba la shim ban pynbha ïa ka sawdong sawkun jong ka kam jngohkai ha baroh kawei ha ka jylla,ka jingkiew jong kane ka kam lah ban pynshisha ba ha u snem 2024 ka jingpoi ki nongjngohkai na ki jylla bapher bapher kala kot haduh 16 lak ngut tam bad 2.3 lak ngut ki dei ki nongjngohkai kiba wan na ki ri bapher bapher.Kine ki jingkheiñ ki long ka jingpynshisha ïa ki jingkylla kiba ngi ïohi ha ka kam jngohkai pyrthei bad ka jingroi ka long kaba ïaid beit bad kaba neh bha ka jingmih na ki polisi bad ki buit treikam ba la thmu ba la buh ha ka jaka.
Haba phai shaphang ka jinglah ban ai kam ai jam ha ka kam jngohkai pyrthei u myntri rangbah ka jylla u la pyntip ba kumba 50 hajar ngut ki briew ki dei kiba ïoh kam (direct ne indirect) bad ka thong jong ka sorkar ka long ban thaw kam sa 50 hajar ngut. La ban jur ruh ba wat kumba ka jylla ka la pyrkhat ïa ka jingkiew ha ka ïoh ka kot na ka bynta ka jylla, hynrei ka jingkiew ha ka ïoh ka kot kan long ruh lyngba ka kam jngohkai, ka rep ka riang, ki karkhana, IT bad kiwei kiwei ki bynta kiba kyntiew ïa ka jingim jong uwei pa uwei u nongshong shnong jong ka jylla.
La pyntip ruh ba mynta ki don kumba 210 tylli ki jingtei kiba dang ïaid kiba iadei bad ka kam jngohkai kiba shongdor kumba 3625 klur tyngka kiba dang pyntreikam ha kylleng ka jylla. Kumba long mynta ka jylla ka don ka jingduna kaba khraw ha ka jingdon ïa ki kamra kumta la donkam ban don shibun ki homestay hapoh ka jylla lyngba ka mission mode.
Kine ki Homestay kiba ka sorkar ka dang pyrshang lyngba ka Chief Minister’s Meghalaya Homestay Mission kin long kum ki jaka sah na ka bynta ki nongïalehkai ha ka por ba pynlong ïa ka National Games 2027 ha Meghalaya bad hadien ka jingïalehkai kin pynbiang ïa ki jingdonkam jong ki nongjngohkai pyrthei kiba wan sha kane ka jylla.Ka jingthmu ka long ruh ban pynduh noh ïa ka jingdonkam ban thaw ïa ka Games Village kaba ju wanrah ïa ki jingeh hadien ki jingïalehkai. U Myntri Rangbah u la pyntip ruh ba ka Sorkar India lyngba ka tnad DoNER kala mang pisa sa kumba T.260 klur hapoh ka PM-DevINE na ka bynta ban kyntiew ïa ka kam jngohkai pyrthei ha Sohra bad ki jaka ba marjan.
Haba kren shaphang ka jingpynïasoh ne ka (connectivity) ka dei ka daw bah na ka bynta ka jingroi bad jingkiew jong ka kam jngohkai pyrthei, u myntri rangbah u la pyntip ruh ba ka thong ban pynheh ïa ka kad liengsuiñ Umroi ka long ban pyndep ha kaba sdang jong u snem 2027 bad kane kan pynsuk ban hiar ki liengsuiñ kiba kham heh na ki nongbah bapher bapher jong ka ri. U la pynshai ruh ïa ki projek kiba dang don ha ka jingthmu ban pynbha ïa ka tourism ecosystem ha Meghalaya khnang ban lah ban khring ïa ka jingwan ki nongjngohkai pyrthei ha ki por ban wan.
Ha kaba ïadei shaphang ka jingmut jong ka concert economy kaba u Myntri Rangbah u ju kdew bunsien ba kane ka dei ka jingmut kaba la pyntreikam la slem bha bad kine ki kam kim kyntiew tang ïa ka kam jngohkai pyrthei hynrei ka jingmih kaba mih na ki concert ka kham heh bha ban ïa kaei kaba ka sorkar ka bei tyngka ha kine ki nongpynïaid bad pyntip ruh ba ka sorkar ka pynlut 23.5 klur ha u snem 2024-25 hynrei ka jingïoh khajna ka long 133.43 klur.
Baroh ki jingpyrshang ban thaw ïa ka sawdong sawkun na ka bynta ban pynthikna ba ka kam jngohkai pyrthei hapoh ka jylla kan kiew shaphrang bad kam don jingmut lada ki nongjngohkai pyrthei kim don ïa ka jingsuk, kaba sah jingkynmaw, kaba shngaiñ. Ka dei ka kamram jong uwei pa uwei u nongdon bynta ban pynthikna ba uwei pa uwei u briew uba wan jngoh ïa ka jylla jong ngi un mih noh da kaba sngewtynnad, sngewhun bad sah kynmaw junom lane ban kwah wan biang sha ka jylla.
