Shillong Lber 11: Baroh ki kam jong ka Greater Shillong Water Supply Scheme (GSWSS) phase-III ki la dep mynta la kumba 76 percent.
Ïa kane la ïathuh da u Myntri ka tnat Public Health Engineering (PHE) u Marcuise N Marak haba jubab ïa ka jingkylli ha ka sngi baar hapoh ka Dorbar mang tyngka.
U la ong ruh ba ka jingthmu ban pyndep ïa kane ka GSWSS-III ka dei ban long ha u Lber, 2025.
U la pyntip ruh ba ka jingslem ban pyndep ïa kane ka kam bad ka project ka dei ka jingduna ki nongtrei, ka jingslem ban ïoh ka jingbit na ka bynta ki ban siang ïa ki pipe na ka tnat PWD bad ka NHIDCL, nangta ka jingslem ban ïoh jingbit na ka tnat ki kam khlaw, kaba slem ban ïoh jingbit na ka Ministry of Defence bad kumjuh ruh ka jingslem ban ïoh ka NOC na ka Hima Mawphlang ha kaba ïadei bad ki kam jaka na ka bynta ban shna ïa ka stage II pumping.
