Ka jingpynshai u Myntri Rangbah ka long ban pynkulmar, pynbeij bad buhrieh ïano ïano kynnoh ka Green-Tech

Shillong, Ïaïong 10: U Secretary General jong ka Meghalaya Green-Tech u Samla Ritre Lyngdoh u la ther tyngeh ïa ka Sorkar Jylla bad khamtam eh ïa u Myntri Rangbah ka jylla u Conrad Sangma haba ïadei bad ka jingpynshai halor ka jingthmu jong ka Sorkar ban buh ki jingtei kiba ym dei ki ban neh shyrta hapoh ka Dewlynnong u Lumpongdeng ha Umïam.
Haba ïakren bad ki lad pathai khubor ha ka sngi Thohdieng u Samla Ritre Lyngdoh u la ong ba ka jingpynshai jong u Myntri Rangbah ha ka miet Sngi Palei ka long tang ban shu pynbeij, ban pynkulmar ïa ki paidbah bad kumjuh ruh ban buhrieh ïano ïano kiba ïoh ban pyntrei ïa ka projek ha katei ka Dewlynnong.
U la pynpaw ruh ka jinglyngngoh ba u Myntri Rangbah uba bat ruh ïa ka Tnat Forest and Environment u la pynshai halor ka MoU ba la ïasoi hapdeng ka Tnat Jngohkai pyrthei hynrei khlem pynpaw pat badno la ïasoi ka jingmynjur halor ka jingtei ïa ka Resort and Spa hapoh ka Dewlynnong.
U Samla Ritre u la ïathuh ba ka Green-Tech ka tip badno ka Sorkar ka la ïasoi bad tip ruh ïano ka Sorkar ka la khot ïa ka tender bad thaw ruh ïa ka SPV.
Haba phai sha ka jingpynshai u Myntri Rangbah ba yn ym shah ban don ki jingtei ba neh shyrta u Samla Ritre u la pynksan da ka jubab RTI kaba la kdew shai ïa ki jingai jingbit ban tei ïa ki vellas, restaurant, cafe bad kiwei.
“Ka Green Tech naduh ka sngi Palei ka la ïeng ha ka nongrim bad pynlong ruh ka jingïakhih ban tied ïa ka jingkhang jong ka sorkar hynrei ka sorkar ka la pyndonkam bakla ïa ka bor bad kynnoh ruh ba ka Green Tech ka thaw ki jingkulmar ha ka imlang sahlang bad ka sorkar ka la pynshai ha ka janmiet jong ka sngi Palei hadien ba la pynlait noh ia dkhot na ka jingshah kem, hynrei kane ka jingpynshai ka long tang ban pynbeij ïa ki paidbah bad ban buhrieh ïano ïano,” ong u Secretary General.
U la ong ruh ba lyngba ka RTI u Myntri Rangbah u la ïalam bakla ïa ki paidbah naba lyngba ki jingai jingbit la kdew ïa ka Vellas, ki Restaurant, Café bad kiwei, hynrei la pynshai pat ba kan ym don ka jingtei kaba neh shyrta.
“Kumno kan lah ban long ba ki jingtei kin long kiba rit katba ka CTE pat ka kren da kumwei pat, naba ban poi sha Lumpongdeng kam long kaba suk hap ban shong da ki lieng bad ban pynlong ïa ki tamasa, ki jingput jingtem kin pynjot thiaw ïa baroh ki jingitynnad jong ka mariang bad ka Dewlynnong, kumta ngim kwah ban pynlong ïa kane ka jaka kum ka jaka khaïi bad haba paw kumne mano ba ïalam bakla ka Green Tech ne ka sorkar jylla,” bynrap u Secretary General.