Shillong, Nailar 12: Ka nongbah Shillong ha ka sngi baar ka la shim ïa ka sienjam kaba khraw ban pynneh ïa ka jingïaid ki kali ha sor da kaba plie noh da ka Ride Shillong, ka bicycle kaba la pyndonkam da ka bording ha kaba kane kan ïarap ruh ban wanrah ka jingkhuid bad ka jingkoit jingkhiah ha ki surok bad lynti siengkien.
Ïa kane ka prokram la wan ban long kongsan da u Myntri Rangbah ka jylla u Conrad K. Sangma, bad u Milind Soman, Indian actor ha ryngkat lang bad ki heh sorkar bad kiba ñiah cycle na kylleng ka nongbah.
Kane kadei ka kam ba la sdang da ka sorkar na ka bynta ka jingdonkam kaba bha ïa kiba ïaid lynti bad kito kiba sngewtynnad ban pyndonkam ïa ki cycle ha Shillong, ha kaba ïa kane la pyntreikam da ka jingkyrshan ka Ministry of Housing and Urban Affairs, GIZ (India-Germany cooperation), Meghalaya Tourism bad ka Green Urban Mobility Partnership.
U Myntri Rangbah haba kren ha kane ka sngi ula pynpaw ka jingsarong ban ïoh plie ïa kane ka project kaba dei ka bynta kaba kongsan bha ha kane ka por kaba mynta.
“Mynta ka sngi ka dei ka kam kaba kongsan bha ban ïoh plie ïa kane ka kam kaba thymmai, ha kaba kane kadei ka bynta ban wanrah ka jingbha ïa ka nongbah,” u la ong. “Ka Shillong kadei ruh ka jaka kaba long lum, hynrei da ki electric bicycle, ngin lah ban weng ïa ki jingeh.”
“Da ka Ride Shillong, ngi ai ïa ki briew jong ngi ka lyer kaba khuid, kaba koit ba khiah bad ka mariang kaba khuid ba suba. Nga pynshlur ïa ki samla pule, ki nongtrei bad kiba wan jngohkai ban pyndonkam da ka cycle ha ki kam jong ki ba manla sngi. Ngi lah ban tei ïa ka Shillong kaba kylluid naba ka la long lypa kaba khapngiah,” u la ong.
Na ka liang u Urban Affairs Commissioner & Secretary Dr. Vijay Kumar u la ong ba kane ka prokram ka dei kum ka dak ban pynlong biang ïa ka Shillong kaba bun ki briew kin ïaid noh da ka kjat.
Na ka liang u Milind Soman haba kren u la ai ka jingïaroh ïa ka jylla halor kane ka sienjam kaba dei na ka bynta ka jingkoit jingkhiah.
Ïa kane ka prokram la sdang da ka jingplie paidbah ïa ka jingïaid cycle na Elephant Falls sha Mawphlang da u Dr. Vijay Kumar, bad ka jingleh burom ïa u Myntri Rangbah bad ïa u Milind Soman. La ïoh ki jingkren pdiang na u Dr. Vijay Kumar ha kaba u la ong ba ka PBS kadei ka jingsdang ban wanrah ïa ka koit ka khiah bad u Milind Soman u la kren shaphang ka jingdonkam ka koit ka khiah da kaba pyndonkam ïa ki cycle.
Kham hadien na ka liang u Myntri Rangbah u la pyllait bad plie ïa ka Electric Public Bicycle Sharing System, ha kaba la bud pat sa ka jingñiah ïa ki cycle ha nongbah Shillong.
Ha kane ka sngi la donlang ka DC East Khasi Hills ka Kong RM Kurbah, u Manjunath Sekhar (Director, Sustainable Urban Mobility, GIZ India), bad kiwei ki heh ophisar na ka sorkar jylla, ka GIZ, bad ka Green Urban Mobility Partnership. Ha kane ka sngi la ïoh ki kyntien ai khublei na u Manjunath Sekhar. Ka jingthmu ka Ride Shillong ka long ban kyntiew ïa ki kam ñiah cycle bad pynduna ruh ka jingkhapngiah ne dheng kali ha ki surok, nangta ban ïoh ka lyer kaba khuid bad ka jingdonkam ka koit ka khiah.
La ong ba ka ‘Ride Shillong’ ka treikam bad ban ïoh ki lad jingtip hap ban download ïa ka Ride Shillong app
Scan the QR code ha kano kano ka bike ban shem ïa ka. Lah ban ñiah shano shano bad hap ban pynïeng tang ha ki jaka ba la buh da ka sorkar.
Ka jingshim pisa ka long T. 50 bad T.10 na ka bynta ka jingpyndonkam palat ïa ka por bad ba dei ban phong ïa ka helmet, bud ia ki kyndon pynïaid kali.
