Ka jingpynkylla ïa ka MGNREGA sha ka VB-GRAMGA ka dei ka jingïohnong ïa ka jylla bad ki paidbah : Sosthenes Sohtun

Shillong, Rymphang 02 : U Myntri ka Tnad Community & Rural Development Bah Sosthenes Sohtun ula pynpaw ba ka jingpynkylla ïa ka Mahatma Gandhi National Rural Employment Guarantee Act (MGNREGA) sha ka Viksit Bharat Guarantee for Rozgar and Ajeevika Mission (Gramin) (VB G-RAM-G) Act,2025, ka dei ka jingïoh nong ïa ka jylla bad ki paidbah hi.
“Haba khmih ïa ki jingïakhein ïadiah, ka pyni ba ka Sorkar Jylla jong ngi kan ym duh eiei ruh em. Ha ka jingshisha kan ïohnong pynban namar mmynta ka sorkar pdeng kan ai 90% bad ka sorkar jylla 10 %” ong u Bah Sosthenes haba ïakren bad ki nongthoh khubor ha ka sngi Nyngkong.
“Ka synñiang jong ka Jylla ban thied ïa ki tiar ki tar baroh shi katta ka long 25 % hynrei mynta ka la hiar na ka 25% sha ka 10%, bad ka jingaikam bylla sngi ruh ka la kiew na ka 100 sngi sha ka 125 sngi ka ban pynmyntoi bha ïa ki briew ba don ïa ki job card bad ki unskilled worker” ula ong.
Kane ka Act thymmai kan kynthup ruh ban pynbha bad shna ïa ki skul sha nongkyndong. Ka jingmang pisa ka lah ban kiew na ka 1200-1500 sha ka 2000.
“Kane kan pynmyntoi bha ïa ki paidbah ka Jylla jong ngi, khamtam ki longïing kiba duk, ki briew ba don job card bad ki unskilled labour” bynrap u Bah Sosthenes.
Haba kylli, u Bah Sosthenes ula ban jur ba ka Sorkar ka pdiang ïa kane ka Act ba thymmai namar ka pynmyntoi ïa ki paidbah ka Jylla. “Ka Sorkar jong ngi ka pdiang ïa kane ka Act, kaba pynleit jingmut halor ka jingmyntoi ki briew jong ngi” ula ong.
Haba khmih ïa ki jingsngewkhia halor ka jingpyndonkam bakla ïa ka pisa, u Bah Sosthenes ula ong “Ka Act ba thymmai kan wanrah ïa ka jingtreikam kaba shai, kaba ailad ïa ki VEC bad ki briew ba don ki job card ba kin peit pyrman ïa ki kam bad ki jingmyntoi”.
Ula bthah ïa ki Ophisar ba kin pynbeit ryntih ïa ki rukom pynïaid kam ban khang lad ïa ka jingpyndonkam bakla ïa ka pisa. “Kum u Mytri ngan sa bthah ïa baroh ki Block, ki BDO, ba kin pynbeit ryntih ïa baroh ki kam ha kata ka dur ba kan nym don satia ka jingpyndonkam bakla ïa ka pisa jong baroh ki skhim ba la ai sha ki”.
Halor ka jingpynïoh Internet na ka bynta ka eKYC, u Bah Sosthenes ula kubur ïa ka jingeh bad kular ban pyrshang ha ka ban pynbiang noh katba lah.
“Ngan sa ïakren ïa kane bad u Myntri Rangbah ka Jylla bad sa lum ïa ki jingkheiñ na ki VEC khnang ban lah pynbeit ia kane ka jingeh” ula ong.