Ka jingpynkylla ïa ka MGNREGA ka ktah beit beit ïa ka kamai kajih ki nongshong shnong: Congress

Shillong, Nohprah 19: Ki nongïalam ka Congress bad ki nongtrei jong ka, ha ka sngi Thohdieng ki la pynlong ka jingïakhih pyrshah hakhmat ka ophis jong ka seng Bharatiya Janata Party (BJP) state pyrshah ïa ka sorkar pdeng hadien ba la pynkylla dangshen ïa ka Mahatma?Gandhi National Rural Employment Guarantee Act (MGNREGA) bad na ka liang ka seng ka la ong ba ka jingpynkylla ïa kane ka skhim ka ktah beit beit ïa ka kamai kajih ki nongshong shnong.
“Ka jingpynsangeh ïa ka MGNREGA bad ka jingpynkylla ïa ka sha kaba ki khot da ka ‘Jayramji’ kam dei tang ka jingpynkylla ïa ka kyrteng hynrei ka la ktah beit ïa ki hok tynrai ka riti synshar ka ri kaba dei hok jong manla ki nongshong shnong ban trei,” ong u Secretary ka Meghalaya Pradesh Congress Committee (MPCC) u Bah M Badwar sha ki lad pathai khubor.
“Kane ka aiñ ba thymmai ka wengnoh ïa ka jingailad ïa ki nongshong shnong ban trei 100 sngi, ka ieh noh ïa ki jingïohkam hapoh ka jingpynïaid jong ka sorkar kaba long ruh halor ka nongrim jong ka jingdon ka pisa ne fund. Kane ka pyntynrong ïa ka jingban khia na ka sorkar sha ki paidbah.”
U Bah Badwar u la maham ba kane ka jingleh ka ktah kum ka atiar ïa ka skhim ka bha ka miat ki nongshong shnong, ha kaba ka la pynkylla ïa ka sha ka tiar jong ka saiñ pyrthei kaba lah ban pyndonkam da kaba shu jied.
“Ki shnong ki thaw kin sa jynjar bha naba ki hap shaniah halor ka mon saiñ pyrthei jong ka party kaba synshar. Ki nongshong shnong kiba mynshwa ki don ka kam kaba shngaiñ hynrei mynta kin lah ban shem ïalade khlem ka kam ban trei, kan ktah ïa ka kamai kajih jong ki bad kan pynbor ïa ki longïing sha ka jingpynap jong ka ram,” u la bynrap.
U la pynpaw ruh ba kane ka jingleh kan ktah shibun ha kaba ki khynnah ki lah ban mihnoh na ki skul ban wad kam, ki bainong ha ki thaiñ nongkyndong kan ktah na ka daw jong ka jingbun palat ki nongbylla bad kiba ai shah kin lah ban khñiot ïa kiba rit bad kane kan pynjur ïa ka jingdon kiba duk ba kyrduh. “Ha Meghalaya, ha kaba kiba bun ki shaniah ha kane ka skhim bylla 100 sngi, kane kan pyndkoh ïa ka ïoh ka kot jong ki longïing,” ong u Badwar.
Haba khot ïa ka jingdonkam ban ïeng tylli kawei ban pynpaw ka jingpyrshah, u la kyntu ïa ki sengbhalang, kiwei pat ki seng saiñ pyrthei bad ki paidbah ban ïasnoh kti lang ha kane ka jingpyrshah.
“Ngi dei ka jylla ka bym riewspah; ka ïoh ka kot ne per capita GDP jong ngi ka dei napdeng kaba rit tam ha ka ri. Ngi dei ban ïeng bad ban ïada ïa ki nongshong shnong na kane ka jingleh pyrshah ïa ka Congress bad ki jingthmu ki jingmut jong u Mahatma Gandhi,” u la pynpaw.