Shillong, Rymphang 26: U Myntri Rangbah ka jylla u Conrad Sangma ha ka sngi Palei u la ong hapoh ka ïing dorbar ba ka jingpynkiew ïa ka pisa kaba long T. 20 klur ka dei ka bhah jong ki Myntri.
U la ong ruh ba ka Discretionary Grant ka dei ha ka bynta jong ka Chief Minister Special Development Grant bad ka Chief Minister Special Grant bad kiwei pat ki skhim ki dei kiba la pyntreikam lyngba ka CM Secretariat.
“Kumba 75% bad 80% ka jingpynkiew ka dei na ka bynta jong ki kam pynroi ha kiba bun ki liang,” ong u Sangma.
U la pynshai ruh ba kane ka pisa kam dei tang ban thied ïa ki kali kumba la kynnoh da ki nongïalam ka liang pyrshah bad ong ruh ba kumba ka long mynta kam shym la don kano kano ka thied ïa ki kali kiba thymmai.
Na ka liang jong u Myntri Rangbah u la ong ba ïa ki skhim la dep ban ai lang ïa baroh ym tang ïa ki MLA kiba don ha ka liang synshar.
“Ngam dei u Myntri tang jong ka NPP, hynrei nga dei u Myntri Rangbah ka jylla Meghalaya,” u la ong.
U Myntri Rangbah u la ong ruh ba ki kam jong ka sorkar ki la ïaid beit ïaid ryntih ha kine ki snem ba la leit.
U la ong ruh ba ha ki por kiba mynshwa ki file kiba dei ban shim por kumba 26 sngi mynta ki la shim por tang 2.6 sngi bad kane ka la long lyngba jong ka e.proposal bad kane ka la wanrah ruh ïa ka jingkheiñ kaba shai.
