Shillong, Risaw, 17: U Myntri ka tnat Jngohkai Pyrthei u Bah Paul Lyngdoh ha ka sngi Palei u la ong ba ka jingpynheh ïa ka Shillong Airport kaba don ha ka shnong Umroi, kan wanrah ïa ka jingkylla ïa ka jylla bad kumjuh ha ki kam jngohkai pyrthei.
Katkum ka jingong jong u, palat 3000 ngut ki samla kin ïohkam na ka khih ka kamai kali.
Ha ka jingïakren bad ki lad pathai khubor, u Bah Paul u la ong ba ka komiti ba la thung da ka Sorkar ïa kaba la khlieh da u Director ka Tourism ka la lum jingïalang ïa baroh ki kynhun ban ïathir ïatai sani halor kiba bun ki mat.
“Da lade ruh nga la ïashim bynta ha ki ar tylli ki jingïalang bad ban ïakynduh ïa ki kynhun kiba ju khmih bad pynïaid ïa ki kam jngohkai pyrthei. Ka jingpynheh ïa ka kad liengsuin kan wanrah ïa ka jingkylla. Tang shu urlong, ka jingshaniah jong ngi ha ki surok bad ka leit ka wan da ki kali kan kham duna bad da ka jingpynïar ïa ki jingtreikam jong ka tnat, ngin sa don ha ka lynti ban plie ïa ki lad ïohkam ym duna lai hajar ngut ki samla,” u la ong.
U Bah Paul u la pynbna ruh ba ka tnat shen kan sa ïakynduh ruh ïa ki nongpynïaid ïa ki kam jngohkai pyrthei.
“Ngin sa sdang shwa na ki 50 ngut ki samla, ki ban don bynta ha kaba long nongkdew lynti, ban ai jingtip bad ban mihkmat ïa ka dur jong ka Meghalaya ha kaba ïadei bad ka jingwan rung jong ki nongjngohkai sha ka Jylla. Ha kaba sdang, ngin sa don ïa kine ki ha Sohra, Sohra, Umïam bad ha Shillong,” u la ong.
Haba kylli halor ki mat ba la pynsngew da ka Taxi Association, u Bah Paul u la ong ba ka Komiti kan sa ïakynduh ïa ki ha ka sngi Thohdieng.
“Kaba ar, phi la ïohi ïa ka jingkynthoh na kiba bun ki kynhun. Ki la pynpaw ba phim lah ban khang ïa ki nongñiah kali na na kawei ka jylla ban rung sha Meghalaya. Ki la kren da kaba shai. Ka dei ka Sorkar kaba kren ïa kata, hynrei kiba kren ki dei ki kynhun bapher bapher. Da kaba ong kumta, ngi hap ban peit ruh ïalade kumno ban pynjanai ïa ka jingshakri, ka ktien ka thylliej, ka jinglong, ka riam ka beit, ka jingbiang por. Ha kum kane ka juk don ka jingïakob, ki briew ki ïohlad ban jied katba mon. Namarkata, ngim lah ban buh ha ka kyrdan kaba ar ïa kine, ki dei ban long ki bynta kiba kongsan haba phi jied ïa ka kam. Nalor kata, ha ka khih ka kamai kaba long manla ka sngi, ngi duna haduh 3500 hajar tylli ki kali ban wan kit ïa ki nongjngohkai pyrthei sha ka jylla Meghalaya,” u la bynrap.
Shuh shuh u Bah Paul u la ïathuh ba ka Umïam shen kan sa long ka shlem jngohkai pyrthei kaba hakhmat eh.
U la ong, “ngi dang don ha ka lynti ban wad jaka. Ïa ka jaka la aiti sha ngi kumba 300 akar da ka MeECL lyngba ka tnat Bording. Kumjuh ruh, ha Lum Nehru Park, kaba dei jong ka tnat Forest, la aiti sha ka tnat Jngohkai Pyrthei. Baroh kawei ka jaka bad ha ki bynta jong ka Umïam yn sa pynkylla sha ka jaka jngohkai pyrthei kaba pawkhmat ynda ladep shna lut nadong shadong.”
Halor ka jingshah ktah jong ka mariang, u Myntri u la ong, “phi hap ban tip ba ka Ingbishar High Court ka la don ha jingkhang iing jong ngi. Phim lah ban leh ïa kano kano ka kam ba ka Ingbishar kan sa buh ïa u dak jingkylli ha kano kano ka por. Ngi hap ban peit bha ïa kine ruh. Ngi kwah ban trei hapoh ki kyndon khlem da pynjot ïa ka mariang, ïa ki um ki wah kiba dei ki thong bakongsan eh jong ngi ban khynniat shakhmat ïa ki kam jngohkai pyrthei.
