Ka jingpynhap ïa ki khatwei shnong sha Assam ka dei ka jingibeiñ ka sorkar ïa ki nongsynshar hima: Sirdar Hima Nonglang

Nongstoiñ, Nailar 4: Ka jingïasoi jong ki ar ngut ki myntri rangbah ïa ka soskular pynbeit pud, khlem da pan jingmut shuwa na ki nongsynshar hima la ki dei ki hima Syiem ne ki hima sirdarship, ka dei ka daw bah kaba pynmih ïa ki kynrum kynram hapoh ka jylla, ong u bah B.Ñianglang u Sirdar jong ka hima Nonglang sirdarship haba pyntip ha u nongthoh khubor.
U bah Ñianglang u la ong, “Ka jingjaw jong ki ummat na ki longkmie na ki khatwei tylli ki shnong, kiba la shah khynñiat jubor sha Assam,ka la pynpait dohnud ym tang ïa ki paitbah nongshong shnong hapoh ka hima baroh kawei. Hynrei ki hajar phew hajar ki longkmie hapoh ka jylla kiba ïohi ïa ka jingjaw ummat jong ki lyngba ki lad pathaikhubor bapher bapher ki jaw ummat lang. Pynban, u Conrad Kongal Sangma Myntri Rangbah ka jylla um patiaw ei ei bad nu nag pyneh shuh shuh da kaba ong ba ïa ka soskular ba la ïasoi yn ym lah shuh ban pynkylla”.
U la ong ruh, “Ka long kaba ithamula haba ïohi ïa ki ar ngut ki nongmihkhmat jong ka Rambrai Jyrngam Constituency kata u bah Kimfa S.Marbañiang MLA bad u bah Bajop Pynrope MDC, ba ki kren ksan ha ki lad pathai khubor da kaba kam ba ki don tang lai tylli ki shnong kiba shah khynñiat jubor sha Assam. Kitei ki nongmihkhmat kim tip satia ïa ka jingshisha bad ki shu kren ksan tang ban darap jot namar mynta ki la leit pynïasoh sha ka NPP”.
“Na ka liang ka hima ryngkat ki nongïalam jong ka Hynñiewtrep Youth Council, kin ïai pyrshah bad kin ïai dawa ba ka sorkar ka dei ban pynphai biang ïa kitei ki khatwei tylli ki shnong sha West Khasi Hills. Mynta ka jingpynkhreh ban leit mudui sha ka Ïing bishar ba ha khliehduh jong ka ri ka Supreme Court ba don burom ka dang ïaid shait shait”.
“Ka jingleh jong u Myntri Rangbah ka jylla kam dei tang ka jingibeiñ ïa ki paitbah ka hima Nonglang sirdarship, hynrei ka pyni shai kdar ba wat ïa ki dkhot jong ka Regional Committee on Border Dispute jong ka West Khasi Hills ruh um kheiñ snep satia, namar ba ka jingïasoi ïa ka soskular pynbeit pud kam shym la ïadei satia bad ka kaiphod ba la phah da u Chairman bad ki dkhot ka Regional Committee”.
“Katkum katei ka kaiphod ba ka Regional Committee ka la phah, ki don tang ar tylli ki shnong kiba ym shym la pynhap ha ka Hima Nonglang Sirdarship, namar kitei ki shnong ki dei kiba la shnong la sah da ki Nepali bad ki Rabha naduh hyndai bad ki la dei pura ki shnong kiba hap ha ka Assam. Ka jubab kaba shai halor ka jingleh donbor bad ka jingñiew beiñ jong u Myntri rangbah ïa ki paitbah katei ka hima kan sa paw pyrthei ha ka elekshon kaba long ha u snem ban wan”, u la ong.