K a long kaei kaei kaba lam sha ka jingsngew ïahab malu mala, haba ka sorkar jylla, ka la rai ban pynduh noh ïa ka personal interview, na bynta kito kiba ïaleh ïa ki kam kiba hab ha ka kyrdan Grade D, lane kiba trei ïa ki kam sar ïing, ki kam peon, ki kam chowkidar ne ki kam ap ophis, ki kam shet bad sa kiwei de ki kam, kiba hapoh duh, ha ka kyrdan jong kiba trei ophis kumba la pynbna bad ba la rai da ka jingïalang jong ka kynhun Myntri ka sorkar jylla.
La sngewthuh ba kane ka jingbuh ïa ka personal interview, na bynta kitei ki kyrdan kiba rit, ka la dei ka jingleh ñiewbeiñ hakhmat ki briew hakhmat jong U Blei, namar ba kito kiba sngewkhaiñ, kiba sngew heh kyrdan, ki buh da ki jing kylli, kiba kine kiba pli, kiba kit daju ha Ïewduh, kiba leit bylla saitjaiñ, kiba sar surok kim pei bad shemphang satia haei haei ruh ïa ki jingkylli jong kitei ki stad kot bad katei ka plie lad, ba kitei kiba pynïaid interview ba kin ïa thep ïa uba ki kham imon hi ma ki, namar ba kim don kino kino ki kyndon.
Na kaei kaba ïa sngewthuh paidbah bad ïa sngewthuh lang, ka long ba ki kam ha ka grade D, ki lah ban dei na ka bynta kito kiba shu nang tang ban soi kyrteng lane kiba la pyndep ïa ki Class VI lane Class VII, ne Class VIII bad na ka bynta kitei ngim dei ban khmih lynti ba kin nang ban thoh dak bha, lada dei ha ka Khasi ne ha ka ktien phareng (English) bad ba kin nang ban type computer, ban thoh shithi bad wat ba kin ïakren bad ki ophisar ha ki jaka treikam jong ki kaba manla ka Sngi.
Kumta kumba long hi barabor, kaba kongsan eh hangne, ka dei namarkata ba haba phi kwah thung kam ïa kito kiba dang duna ka kyrdan pule, ka donkam ruh ban buh ïa ki jingkylli ha ka eksamin thoh lane ka written test, kaba ïahab, katba long kat kum ka kyrdan pule jong ki lane kaba dei ban shu peit ïa ka jingtbit jong ki ban thoh dak, ban soi kyrteng bad ban pule ïa ki kot ki sla, kiba thoh ha ki jingsop jong ki file.
Ka Meghalaya Public Services Commission (MPSC), ka la dei ban buh da ka syllabus kaba biang, na bynta ki jait kam bapher, ha kaba kiba ïaleh eksam kin nang ban pynkhreh, namar ba lada kat ïa ka eksamin SSLC, ki lah ban pyndonkam tang da kaba shu pule ïa kawei ka kot lane ka CM Guide, kumta kan don jingeh aïu, ban pynkhreh da ka syllabus kaba biang thik, ba uba pule Class VI ne Class VIII, un lah ban jubab ha ka eksamin Grade A, ne ha ka kyrdan Grade B, ha ka kyrdan ka grade C ne ka D ruh; namar ïa mynta la ju lap, ba ka kam ka dei kaba rit than, katba ki jingkylli ha ka written test ka la jan ïahab, ïa uba ïaleh ia ka eksam Meghlaya Civil Service ne MCS bad katei ka dei ka jingkhanglad ïa kito kiba pli kiba tlot ba kin shah jied ha kitei ki kam kiba rit ne kiba ïahab ïa ki kyrdan pule jong ki.
Kine ki interview kam sorkar, ki dei tang ki buit ban khanglad ïa kito kiba kut jingmut ba kin trei, namar ba ynda ki la treikam, tangba kin shongthait ban pule kotkhubor ruh, kim don lad, namar ki hap ban ap ïa ka baje kaba khriang shi khriang ban rung ban mih sha kamra ki heh ki haiñ, haduh ba ïa ka pliang ja jong ki ruh hap leit shim na miej bad na kaei kaba ki ïaleh interview, tang kawei ka mat ruh kam ju wan satia, wat haduh, ba kin da shongthait na ki kam jong ki ruh.
Ha kawei pat ka liang lah ban ong ba ngi kiba ju rung ha kiba bun ki ophis sorkar ngi shait lap bad ïohi ba ki peon, ki nongtrei casual kiba shong habar ki kamra treikam jong ki heh ophisar ki hap ban rung ban mih shiphang shiphang na ki Kamr treikam jong ki heh ki haiñ tang shu ïohsngew ba la ai bell hynrei don pat ki nongtrei ha ki kamra jong ki MLA ne Myntri sorkar pat kiba shu ïabun ngut bad pynkhapngiah ïa ka kamra jong ki personal ne private secretary ba la thung da ka sorkar ne da ki MLA ne ki Myntri sorkar ki shu dap hi mam da ki nongtrei ba la shu thung hynrei don pat kiba ym donkam satia ban treikam.
Kumta kaei kaba donkam mynta ka long tang shu ïa ap bad khmih lynti kumno kane ka kam kan tyllun haba ïadei bad ka jingpynduh noh ïa ki personal interview la kane kan seisoh shisha bad kan ïarap shisha ïa kiba ïakhun eksam kam sorkar, khamtam eh ïa kito ki longïing jong ki rangli ki juki, ki bym ithuh ne don jingïadei kaba jan bha bad ki heh ki haiñ ne ki Myntri sorkar ban shu thungkam beit na shadien khlem da pynshitom bad mih ka um syep.
