Ka jingpynbthei Dynamite ha ki par tih dewïong be-aiñ kan dang buh jingma bad jingïap ïa bun ngut: Justice Katakey

Shillong, Rymphang 9 : U Justice BP Katakey, uba khlieh ïa ka Committee ba thung ka Iing Bishar High Court jongka jylla, ula pynpaw ka jingsngewkhia kaba khraw halor ka jingbthei dynamite ba dangshen ha ka par dewiong ha East Jaintia Hills, haba maham ba ka jingpynbthei dynamite ha ki par ba tih dewiong beaiñ, ka long ka jingma bad kaba dang lah ban lam sha ki jingiap briew shuh shuh, kumba la jia ïa ki mynsiem jong 27 ngut ki briew ha Mynsngat-Thangsko.
“Ka long kaba ima shikatdei eh ba ki la sdang ban pyndonkam sa u dymanite na ka bynta ban tih dewiong beain. Kham hashuwa, kaei kaba ki ju leh ka long ba ki phah ïa ki briew shapoh, tih bad sei ïa u dewiong shabar hynrei mynta ki la sdang pyndonkam dynamite khnang ba kin ïoh tih kham bun u dewiong hapoh ka por kaba lyngkot” ong u Justice Katakey.
“Haba peit ïa ki kam beaiñ kiba nga ïohi ha lynti ba nga leit sha katei ka jaka bad ruh ïa ka buit thymmai ba ki la shim ban pyndonkam da u dynamite, nga sheptieng ba kum kine ki jingjia ki lah ban jia biang shen” ula maham.
Ula ban jur ba ki bor district bad ki pulit ki don ïa ka jingkitkhlieh ban ïada ïa ka jingim jong ki nongbylla ba lui lui bad ki dei ban leh tyngeh pyrshah ïa ki trai par.
“Nga la bthah ïa u Deputy Commissioner bad ïa u Superintendent of Police ba ka jingbym leh eiei jong ki, 27 tylli ki metiap lah ïoh ban sei. Phi hap shim ïa ka jingkitkhlieh ban ïada ïa ka jingim jong ki briew ba lui lui. Kine ki dei ki nongbylla ba lui lui, phi lah ban leh tyngeh pyrshah ïa ki trai par dewiong” ong u Justice Katakey haba bynrap “Ka bha eh ba ki la sdang ban leh ei ei bad namar kane, ki la ïoh kurup ïa bun bah ki detonator hapoh ka Umpleng Police Station na ka jaka ba ki khot ka Cement Bazaar bad ruh na ka shnong Mynsngat ki la ïoh kurup ïa katto katne ki detonator kiba thmu ban pyndonkam ha ka jingtih dewiong”.
U Justice Katakey ula hiar sha ka par dewiong ba bthei ha Mynsngat-Thangsko myn ha ka 6 tarik Rymphang bad ïohi da la ki jongki khmat ïa ka jingbun ki krem tih dewiong beaiñ.
“Nga poi ha ka jaka ba jia ha ka por 1 baje janmiet jong ka 6 tarik Rymphang bad kyndit ban ïohi ïa ka kam tih dewiong beaiñ kat shaba phai, ym tang ha kane ka jaka ba bthei, hynrei ha baroh arliang jong ka surok ba poi sha katei ka jaka” ong u Katakey.
“Nga la kylli jingkylli ïa ki nongbylla kiba la ïathuh ba ki la tih dewiong na kane ka thaiñ mynta la 16-20 snem” ula ong haba pynpaw ïa ka jinglyngngoh ba kine ki kam beaiñ kila jia tang 10 km ka jingjngai na Khliehriat bad ba ym don ba ïohi mano mano ruh.
“Baroh baroh ki lah ban ïohi ïa kine ki kam beaiñ lait noh ki bor District” kynthoh u Chairman ka Committee.
Kat kum ka jingpyntip ki bor Sorkar, haduh 27 tylli ki metiap la lap haduh mynta, hynrei ki ba haïing jong ki briew ba dang jah ki sheptieng ba ka jingdon kiba iap ka lah ban nang kiew.
“Ki la ong ba ki dang don bun ban ïa ki met ba la lap, kiba la leit shapoh kane ka par dewiong ba beaiñ” bynrap u Justice Katakey.
Ula bthah shuh shuh ïa ki bor district kynthup ïa u DC bad SP ba kin kurup ïa ki tiar bad ban leh eiei, haba ban jur ba dei ban tyngrong ïa ka jingkitkhlieh bad ba dei ban kem ïa ki trai par.
U Justice Katakey ula pdiang sngewbha ïa ka jingbthah jong ka ïing Bishar ïa u DC bad SP ka East Jaintia Hills ba kin wan mih dalade hapoh ka ïing Bishar, haba pynpaw ba ka dei ka sienjam ha ka lynti kaba dei.
“Ka long kaba dei eh ba ka High Court ka la bthah ba kin wan mih da lade” ong u Katakey haba bynrap “Dei ban ong ha ki ba kaei kaba jia ka dei ka bym lah ban pdiang, bad yn ym sngap jar jar ïa kino kino ki kam beaiñ nangne shakhmat”.