Ka working group ba la seng da ka Reserve Bank of India ha u 2019 ka la ong ba ki nongrep kiba pyndonkam ïa ki rukom rep tynrai ki kham ïoh lad ban shim ram bad shim shah ban ïa kito kiba ri jingri bad kiba ri ïa ki jingri ban khem dud. Namar 75% ki nongri jingri ki dei ki nongrep kiba don 2-4 tylli ki jingri, ka jingïoh ban shim ram bad shim shah ka bteng kum ka jingeh kaba khraw ha ki kam animal husbandry bad kam ri jingri ban khem dud ha India. Ka kaiphod jong ka RBI ka la ong ba ki kam kiba ïadei bad ka kam rep (kam ri jingri, kam khlaw bad kam ri dohkha) ki ïoh tang 10% ka jingai ram ai shah ïa ki kam rep katba ki don ka bynta kaba 40% jong ka jingpynmih ki kam rep. Ka jingeh kaba khraw ïa ki nongri jingri ka mih namar ka khana samari ka ithuh ïa u nongrep lyngba ka jinglong trai jaka jong u. Kumta, ka long kaba eh ïa ki nongrep ki bym don ki patta jaka ba kin ïoh ban shim ram shim shah. Ban pynbeit ïa kane, ka Sorkar ka la wanrah katto katne ki sienjam ban kyntiew ïa ka jingïoh shim ram shim shah bad ban pynbiang pisa ïa ki nongrep bad ki nongseng kam lajong ha ki kam kiba ïadei bad ka kam ri jingri bad ka kam ri jingri ban khem dud.
Tang 41% ki nongrep kiba trei ki kam barit baria ki dei kiba ïoh jingmyntoi na ki bank jong ka sorkar bad ki bank shimet, bad kumta ki don kiba bun kiba hap hapoh ka jingma jong ki nongai ram shimet. Kumta, ban pynbeit ïa kane, ka sienjam kaba nyngkong kaba kham kyrpang ka la wan ha u snem 2019 haba la pynïar ïa ka Kisan Credit Card ban kdup lang ïa ki nongrep kiba don ruh ïa ki jingri. Ka KCC ka ai ïa ka jingpynduna sut kaba 2% sha ki bank bad ka 3% haba ai jingsiew tista da ki nongrep ïa ki Short Term Loan na ka bynta ki kam rep bad kiwei kiwei ki kam kiba ïadei bad kane ki ïoh haduh T. 3 lak kaba pynlong ba ka sut ïa kum kine ki jingshim ram ka long 4%. Ka KCC ka lah ban don ka bynta kaba khraw ban pynkupbor ïa ki longkmie ha ki jaka nongkyndong namar 70% ki nongri jingri ki dei ki longkmie bad kiba bun na ki ki dei kiba shem jingeh bha ban ïoh shim ram shim shah namar kim don eiei ban buh bynda.
Shuh shuh, ka kaiphod jong ka RBI ki pyni ba ki don katto katne ki jylla kiba ïoh kham bun ïa ka Agri-credit haba ïanujor bad ka Agri-GDP jong ki, kaba kdew ba lah ban dei ba ïa ka jingai ram ai shah la pynkynriah na ka bynta ki kam ki bym ïadei bad ka kam rep. Kane ka pyni ïa ka jingduna ha ka jingryntih hapdeng ki thain, namar ki jylla ka ka thain pdeng, ka thain mihngi bad ka thain shatei lammihngi ki ïoh tang khyndiat ka Agri-credit kum ka bynta jong ka GDP na ka kam rep jong ki. Ha kaba ïadei bad kane, ka Sorkar ka la wanrah katto katne ki sienjam ban pyrshang ban pynkupbor ïa ki cooperative da kaba sdang lyngba ka skhim kaba ai ïa ka jingpynduna 4% ka sut ïa ka jingshim ram ban treikam ban kyrshan ïa ki cooperative bad ki Farmer Producer Organization kiba trei ha ki kam pynmih dud ha ka por jong ka pakhang dam namar ka khlam COVID-19 bad hapoh kane, la pyllait T. 333 klur sha ka National Dairy Development Board (NDDB) ban pyndonkam ïa ka jingshim ram ban pyntreikam kaba kot sha ka T. 24,000 klur. Shuh shuh, ki nongrep kiba trei ha ki kam pynmih dud ki shem jingeh bha namar ka kynrum kynram ha kaba ïadei bad ka bording. Namar kane, palat 3% ka dud kaba la pynmih ka dei kaba sepei. Ban pynbeit ïa kane, la pynbna ïa ka Dairy Processing and Infrastructure Development da ka jing thmu ban ai ram ïa ki Cooperative bad ki Farmer Producer Organisation ha kylleng ka ri kiba trei ha ki kam pynmih dud. Ka DIDF ka thmu ban kyntiew ïa baroh ki kam kiba ïadei bad ka kam pynmih dud ha ka ri da kaba ai jingmyntoi ïa ki projek kiba ïadei bad ka jingkyntiew ïa ki jingdon jingem.
Ha kine ki phew snem ba la dep, ki kam shimet ki la don ka bynta kaba heh ha ki kam kiba ïadei bad ka jingpynmih dud. Mynta ka don ka jingduna ha ka jinglah pyntreikam kaba kumba 120-130 MMT, kaba mut ba ka don ka lad bei tyngka kaba kumba T. 20,000 klur. Lada ngi kynthup lang ïa ka jingdonkam ban pynmih bad sam ïa ka dud, ka lad ban bei tyngka ka long kumba T 1,40,000 klur. Da kaba sngewthuh ïa kane, ka tnat Animal Husbandry & Dairying ka la wanrah ïa ka skhim na ka bynta ki kompani shimet bad ki nongseng kam lajong kaba long ka Animal Husbandry Infrastructure Development Fund (AHIDF) ban ai ïa ka jingpynduna sut ïa ka jingshim ram ban seng ïa ki processing unit ha ki kam pynmih dud, ki kam ot doh bad ki kam shna bam ïa ki jingri. Ka jingpynthikna ban ïoh ram ka dei ka atiar ban pynduna ïa ka jingma kaba ai lad ïa ki nongai ram ban ai ram ïa ki MSME. Kumta la seng ïa ka credit guarantee fund kaba T 750 klur ban ai jingpynshngain ïa ki ram AHIDF kaba haduh 25% jong ka pisa ba la ai sha ki nongshim ram. Ban pyndap ïa ki jaka ba thylli ha kine ki kam, la pynkylla ïa ka AHIDF ban pynïar ïa ka skhim sha ka jingpynbiang ïa ki jingdonkam na ka bynta ka jingpynbha shuh shuh ïa ki jait jingri, ka jingshna ïa ki dawai tika bad ka jingpynkylla ïa ki niut sha ka spah.
Katto katne ki jingeh kiba kham heh kiba ki nongri jingri ki ïakynduh ki ïadei bad ka jingduna jingmih bad ka jingduna ha ki mar bam kiba bha.
Nongthoh: Secretary, ka tnat Animal Husbandry and Dairying, u Atul Chaturvedi. Ki jingthoh hangne ki dei ki jingsngew shimet jong u nongthoh.
