Shillong, Jylliew 24: U Chief Executive Member ka KHADC, Bah Pynïaid Sing Syiem u la ong ba ki kwah ba ka jingpynbeit pud hapdeng ka Meghalaya bad Assam na bynta kito ki jaka ba dang sah kadei ban long katkum ka Paragraph 20 jong ka Sixth Schedule.
Haba kren ïa kane haba wanrah ïa ka Mangtyngka na ka bynta ka samoi treikam jong u 2023-24, u CEM u la ong, “Kane ka Executive Committee kan buddien bha ïa kane ka kam bad ka la don ka jingïatreilang bad ka sorkar Meghalaya ban pyntikna ha kaban pynbeit ïa u pud u sam jong ka Meghalaya katkum ka Paragraph 20 jong ka Sixth Schedule da kaba leit jngoh hi dalade kumba nga la kren ha ka jingshimti jongnga kum u Chief Executive Member.”
Shwa kane, u CEM u la pyntip ruh ha Iing Dorbar ba ha u pud u sam jong ka KHADC ki don bun ki jaka ba ïa kajia pud bad ka Assam ha kaba ki don kiba la dep ban pynbeit ha ka kylla kaba nyngkong bad don pat kiba dang sah ha ka kylla kaba ar.
Katkum ka jingïathuh jong u, ki jaka kiban sah ha kane ka kylla kaba ar ban pynbeit ki kynthup naduh ka Langpih, Borduar, Nongwah Mawtamur, ka Desh Domreah bad ka Block – II.
“Ka sorkar Meghalaya ka la kynthup lang ïa ka KHADC kum kawei na ki nongïadon bynta ba kongsan ha kane ka jingïapynbeit pud ha ka kylla kaba ar bad la kynthup ruh ïa ka KHADC ha ka Regional Committee jong ka West Khasi Hills bad ka Ri Bhoi District,” u la ong.
Shuh shuh la ïathuh ba mynta ka jingïakren bad ka jingpynbiang ïa ki kot ki sla ka la ïaid shaid shaid bad na ka liang ka Council ruh ka la ai ka jingïatrei lang bad kaba pura bad ki Hima kiba don ka jingïakajia pud bad ka Assam.
