Ka jingpule ka dei kawei ka lad ban pynkhlaiñ ïa ka jingmut jingkyrkhat: Bah Manuel Badwar

Mawkyrwat, ‘Nailar, 31: Ka Khasi Student’s Union (KSU) jong ka Nobosohphoh Area Unit mynta ka sngi ka la ïoh ban pynkup burom da ka ‘Maitshaphrang Excellence Academic Award 2022’ ïa ki 28 ngut ki khynnah skul jong ka Hima Nobosohphoh Syiemship kiba la wan shakhmat bad ïoh ïa ka percentage kaba 70 shaneng ha ki egsam kiba dang shu dep ha ka klas 10 shajrong bad ïa kane ka prokram la pynlong hapoh jong ka Philip Memorial Hall Rangblang, South West Khasi Hills District ha kaba u bah Manuel Badwar uwei na ki ‘riew rangbah u la long kongsan.
U Bah Manuel Badwar haba kren kum u kongsan, u la pynkynmaw ïa ki khynnah skul ba ka jingpule kam dei kum ka jingïamareh thong ne ka race ne haba ki la ïoh 70% ki la dei kita ki khynnah kiba stad tam hynrei ka dei ka bynta ban pynlong ïa ki khynnah bad ki samla pule ba kin pynkhlaiñ ha ka jingmut jingpyrkhat. U la ong ruh ba lada ki jaidbynriew khasi jong ngi ki dei ki briew kiba smat ne shimkhia ha ka pule puthi, ym ban tip lut ïa kiei kiei hynrei ban pule ban long kiba shemphang kata ka lah ban kyntiew ha kiba bun ki liang namar ka don ka jingïapher hapdeng ka tip lut bad ka jingshemphang. “Ka tip lut ka long ba lada ki briew ki leh da ka ‘Google’ ki tip lut ïa kiei kiei, hynrei ka jingshemphang pat ka wan ha ka jingmut jingpyrkhat jong ki ha ka por ba ki pule”, pynshai u bah Badwar.
Namarkata, u la kyntu ba kum ki khynnah skul ki ban shimkhia bha ïa kane ka bynta namar la shai la shisngi kin hap ban leit shong egsam ha ki jingïakhun bapher bapher, “ban thoh ka long kaba suk palat”, hynrei ha ki interview pat kin peit pat haduh katno ka jingmut jingpyrkhat jong ki samla ki long kiba khlaiñ bad ki dei ban nang ban ïatai nia bad pyrkhat palat ïa kaei ba ki paidbah ki ïohi namar ki paidbah mynta ki la kham stad. U pynkynmaw ba ka don ka jingong, “lada kim lah ban plos ne minos, kumno keiñ kin lah ban multiplai”.
Haba kren ha kaba ïa dei bad ka jingpynkup burom jong ka KSU ïa ki khynnah skul, u la ong ba kane ka long kum ka dak ban pynkynmaw ïa ka jingtreishitom jong ki bad ba kan long ruh ka jingaimynsiem ïa ki ba nangne shakhmat ruh kin hap ban long kiba ïai trei shitom namar ha ka jingpule hi kin don shibun bah ki dieng pynkiang.
U bah Forwardman Nongrem, President ka KSU South West Khasi Hills District kum u symbud kongsan haba ai jingkren u la ba haba ki khynnah skul ki nongïoh pdiang ïa kine khusnam ka long kawei ka dak jong ka jingpyneh-rngiew bad jingaimynsiem ba kin nang ïai kiew na kawei ka kyrdan sha kawei pat. “Ka jingïoh jong ki ïa kane ka khusnam ka long ruh kawei na ki bynta ba kum ki khynnah skul ki la pyni shisha ïa ka jinglah jong ki ban buh ïa kata ka thong bad ba kin nang ïai kiew ha ka jingim jong ki”, ong u bah Nongrem bad kyntu ruh ba ka mynsiem jong ka jingjop bad ka jingïai jop jong ki ka dei ruh lyngba ka jingdon ïa ka mynsiem jong ka jingkut jingmut.
U la pynkynmaw ruh ba kum ki khynnah skul haba ki don hapdeng ki jingpule ki dei ban long borabor kiba kohnguh, burom ïa kiba halor, trei minot bad leh ïa kiei kiei da ka jingieit bad jingsngewrit namar lada kim don ïa kine ki bynta bunsien ka jingim bad ka lawei kam long kaba phyrnai.
Ïa ka jingïalang la pynïaid da u bah Gilbert Thyrniang bad ki jingkren bah Commander Shangpliang, President HFU uba long ruh u President ka Meghalaya Film Makers Association (MFMA), u bah Kynpham Lyngdoh, Pauldeep Tongwah, President KSU Mawkyrwat Circle, ka jingkren khublei na u Baristar Thyrniang, Finance Secretary ka KSU Nobosohphoh Area Unit bad kiwei de ki ‘riew rangbah ha ryngkat ka jingïadon lang ki nonghikai bad ki khynnah skul kiba la wan ban sakhie bad pynshit pynshngaiñ ïa kane ka prokram.