Ka jingpoi ka umbam umdih ha South West Khasi Hills District ka long kumba 85% : EE PHE
Mawkyrwat, Rymphang 02 : Ka jingpoi ka umbam umdih lyngba ka Jal Jeevan Mission (JJM) hapoh ka South West Khasi Hills District ka la long haduh 85% ei ei ha kaba hapoh ka Mawkyrwat Block ka la poi sha ka 79%, bad hapoh ka Ranikor Block pat haduh 94% ha kaba ki paidbah nongshong shnong ki la don hapdeng ka jingkyrmen ba kin sa ïoh ka umbam umdih kaba biang ha ki snem ban wan.
Ïa kitei ki jingpoi jong ki percentage jong ka jingpyntrei ïa ka JJM hapoh ka South West Khasi Hills District ka long katkum ka jingïathuh lyngba u bah K. Nongbsaw, Executive Engineer PHE Mawkyrwat Division haba kren ka jingïalang ba la long ha shnong Sasniang, South West Khasi Hills District ha ka sngi jong ka jingrakhe ïa ka “Jal Arpan Diwas” kaba dei ka sngi ka sngi leh kmen ïa ka jinglongtrai ïa ka skhim JMM namar baroh ki longïing longsem kiba don kumba shispah tam, ki jaka hikai bad ki Aganwadi Centre ki la ïoh lut ïa ka umbam umdih hapoh kane ka shnong Sasniang.
Ym tangkata, na ka liang ka ophis jong u Executive Engineer ka PHE, Mawkyrwat Division lyngba u bah K. Nongbsaw uba dei ruh u Member Secretary ka District Water Mission South West Khasi Hills District u la buh thong ruh ba ha u bnai Nohprah, 2026 lane u bnai Lber, 2027, kum ka ophis kan sa trei shitom bad pyrshang ban pynpoi um kaba long 100% sha ki longïing baroh.
Shuh shuh ha kane ka sngi, na ka liang ka ophis lyngba u Executive Engineer ka PHE, Mawkyrwat Division lyngba u bah K. Nongbsaw ka la ïoh ban pynbna ïa ka shnong Sasniang kum ka ‘Har Ghar Jal Village’ kaba baroh ki longïing longsem ki la ïoh ïa ka umbam bad ha ka la ïoh ruh ban aiti noh ïa ka skhim JJM ha ka shnong khnang ba ka shnong kan pynïaid bad peit hi ïa ki jingdonkam baroh bad kaba la pyntrei ha ka snem 2022 ha ka mang tyngka kaba T.1 klur 57 lak tam tyngka.
Ha kane ka sngi lehkmen la ïadonlang u bah I. Lawriniang uba dei u BDO ka Mawkyrwat C&RD Block, bad kiwei de ki ophisar ka tnad PHE, ki nongshong shnong ki khynnah skul bad kiwei kiwei.