Ka jingplie ïa ka surok kam don bynta bad ka jingpynkynriah ïa ki 342 ïing: Paul Lyngdoh

Shillong, Naiwieng, 05: U Myntri ka Sorkar Jylla u Bah Paul Lyngdoh uba long ruh u nongai ktien jong ka Sorkar ha ka sngi Baar ula ong ba ka jingplie biang ïa ka surok na Them Iew Mawlong kam don bynta eiei bad ka rai ban pynkynriah noh ïa ki 342 tylli ki longing na Them Iewmawlong.
Ha ka jingïakren bad ki lad pathai khubor, u Bah Paul u la ong ba ka rai jong ka sorkar ban pyni da ka “kam’ ka long ban weng ïa ka jingdheng kali bad ka jingsuk ka leit ka wan jong ki paidbah kaba la pynsyrtok ïa ki paidbah ha kine ki hynriew snem kynthih.
“Ngam ïohi ba kan don kano kano ka jingïadei hapdeng kata bad ka jingshim rai ban pynkynriah ïa kiba sah ha Them Iew Mawlong,” ula ong.
Kane ka jingpynshai jong u Bah Paul ka long halor ka jingpynsngew jong ki sengbhalang bad ki seng saiñpyrthei ba ka jingplie ïa ka surok kan nang pynslem shuh shuh ïa ka jingpynkynriah ïa ki briew kiba sah ha Them Iew Mawlong.
Ïa ka surok la plie biang naduh hynin ka Lah Sngi u Blei.
“Ha ka jingshisha, ha ki hynriew snem ba ladep ki jinglong jingman kim shngaiñ hadien ba la mih ka jingïakynad bad mynta ngi la weng ïa kata da kaba ailad biang ïa ka leit ka wan jong ki briew bad ki kali kumba ju long. Kaba kham kongsan ka long ban weng ïa ka jingdheng kali ha baroh kawei ka nongbah,” ula bynrap.
Shuh shuh u la ong, ka Sorkar Jylla ka ïai ban na ka por sha ka por ba kan pynbeit ïa kane ka kam bad ngi la kut jingmut ruh ban leh kumta.