Ka jingpep, ka jingryngkang diengkper ha ka elekshon President ka Ri

New Delhi/ Shillong, Naitung 18: Ka jingïajied ïa u President ba 15 jong ka ri India ka la long mynta ka sngi, ha Parliament bad kumjuh ruh ha ki Assembly jong ki jylla ka ri India.
Ha kane ka jingïajied ïa u khlieh duh jong ka ri, ha Parliament la ïohi ïa ka jingpep thep vote ki 8 ngut ki MP, kynthup ïa ki MP ka BJP, Shiv Sena, Congrss, Samajwadi Party, Bahujan Samaj Party bad ka AIMIM.
Nangta don bun ngut ruh ki MLA kiba la ryngkang dieng kper, ha kaba don ki MLA jong ka Congress bad NCP kiba la kam ba ki la kyrshan ïa ka kyrtong jong ka NDA, ka Droupadi Murmu.
Ha ka elekshon jied President ym ju shah ïa ki Party ba kin hukum ne ai shabuk (whip) ïa ki MP ne MLA ba kidei ban jied beit ïa u kyrtong ba ka Party ka kyrshan, hynrei la shah ba kin jied ba kin jied katkum ka jingsngew bit jong ki.
Ka jingïañiew vote kan long ha ka 21 tarik mynta u bnai bad ïa u President ba thymmai yn pynsmai ha ka 25 tarik.
Katkum ka kywroh ba la pyllait da ka Press Information Bureau (PIB) la ïathuh ba ka jingthep vote ka long 99%, ha kaba 4796 ngut ki nongthep vote kiba dei na ki MP bad ki MLA ki la ïashim bynta. Shuh shuh la ïathuh ba 11 tylli ki jylla bad ka jylla rit Puducherry ki la wan thep vote 100 %.
Ha Meghalaya ruh 4 ngut ki MLA ki la pep ban wan thep vote. Kine ki long ki 2 ngut ki Myntri, u James Sangma bad u Sngiwbhalang Dhar bad 2 ngut na ka All India Trinamool Congress, u Bah Shitlang Pale bad u Marthon Sangma. ki MLA ki la wan ïashim bynta ha kane ka elekshon ba la pynïaid da ka bor elekshon jong ka jylla. Ïa ka jaka thep vote la pynitynnad da ki kup bad ym shym la pyndonkam plastik satia ha kata kaba ki ong ka Green Polling Booth.