Ka jingpang suhkhriat kynrei bha ban shong ha u khmut bad ka jur bha lada ka jinglong u khmut ka don ha ka jingpjah. Ki stad pule bniah ki la pyni ba ka Immune System ne ka bor ïaleh pyrshah khñiang jingpang ka kham tlot ha ki jaka ba khriang ka, hynrei ka jingpang suhkhriat ka kham jur ha ki jaka ba khriat. Ki stad pule bniah ki la ai jingmut ba donkam ban pynsyaid ïa u khmut bad kiar na ka lyer ba khriat. Ka jingpjah ha u khmut ka iohlad lad ban kharoi ka jait khñiang jingpang Rhinovirus. Ïa kine ki jingshem la pyni ha ka Proceedings of the National Academy of Sciences.
Ki Rhinovirus ki long kiwei na ki kynhun khñiang jingpang ba kongsan kiba pynlong ïa ki khmut ban synriah bad mih eitmut. Ka kynhun Yale University ka la leh test ïa shaphang ki Rhinovirus ha ka jingshit kaba 33C jong u khmut kaba duna ïa ka jingshit kaba biang ha ka meit kaba long 37C. “Ka jingkhriat u khmut ka kharoi bha ki khñiang jingpang rhinovirus ha ki jingwadbniah ha ki 50 snem. KI stad wad bniah kim shym la batai bniah satia halar ka jinglap jingshem shaping ka jingpang suhkhriat bad kynrei ki khñiang jingpang rhinovirus ha u khmut ba duna ka jingshit. Ka Dr Akiko Iwasaki, kaba long ka stad pule bniah ka la ong, ka immune system jong u briew ka kylla kaba kham kham tlot ha u khmut ba pjah bad kane ka jingkhriat ne duna ka jingshit ha u khmut ka plielad ban shongneh ki khñiang rhinovirus ban kharoi.
Ki kor ki bor sensor kiba lap ïa ka jingbit khñiang jingpang bad ki dawai kiba ïatreilang bad ka immune system- ki kham tlot ka jingtreikam ha ka jingpjah ne khriat. Ka Dr Iwasaki ka la ong “kyllumlang, ka jingduna ka jingsyaid, ka immune ruh ka duna ban ïaleh pyrshah ïa kine ki khñiang ha u khmut”.
Ki rhinoviruses ki long kiwei na ki tyllong ba kongsan ka jingshitom suhkhriat kaba ju ktah khah khah. Ki jingshem batai ba ka jingpang suhkhriat ka kham kynrei bha ha ki bnai khriat lane aiom Tlang.
U Jonathan Ball, uba long u professor ka Virology ha ka University of Nottingham, u la ong ba kine ki jingshem ki lah ban batai balei ki khniang rhinoviruses ki ktah ne pynbit jingpang ïa u khmut ha ka jaka jong kiwei kiwei pat ki bynta jong ka met, kum ki tor. U la ong “ngi tip ba ka bor jingsyaid jong ki cell ba syrtap ïa u khmut ki long kiba kham pjah ban ïa kiwei kiwei pat ha ki bynta jong ka met bym da ioh lyer. “Kane ka lah ban plie lang ïa ki rhinoviruses ha u khmut bad kim da iohlad ban rung ha kiwei pat ki bynta jong ka met kynthup ha ki tor.”
