Ka jingong u Bah Prestone ‘Husiar’ ban bam dohsñiang ka long kumba pyntieng ïaki paidbah, ong ki nongotdoh

Nongpoh, Jylliew 23: Ka kynhun ki nongot dohsñiang hapoh ka lama ka Khasi Jaintia Pig Butcher Association (KJPBA) mynta ka sngi kila leit ban ïakynduh syndon ïaka District Veterinary Officer ka Ri-Bhoi District, halor ka jingpur ki khubor jong ka jinglyngshop ka jingpang haki sñiang bala tip kum ka African Swine Fever ha kylleng ki district jong ka jylla kaba la ktah shikatdei ïaki nongot dohsñiang haka jylla namar ba ki paidbah kim shlan shuh ban thied bad bam ïaka dohsñiang.
Haba kren sha ki lad pathai khubor mynta ka sngi hadien ka jingïakynduh bad ka District Veterinary Officer u Bah Andie Lyngdoh General Secretary ka Khasi Jaiñtia Pig Butcher Association haka jingïadon lang u bah Boldness Ryngkhlem kum u President bad ki dkhot, u la pynpaw ba hadien kane ka jingïoh ban ïa kynduh bad ki ophisar jong ka tnad Veterinary ki la ïoh jingshai ba kan nym don jingktah lada ngi bam ïaka dohsñiang kaba la shet pyn ih bha ha shwa ba ngin bam ïaka bad naka liang ki ophisar ki la pynshai ruh ba kane ka jingpang sñiang ka la duna bha hapoh ka jylla jong ngi ym shuh kum haki sngi bala leit.
U ne u nong ïalam jong ka Khasi Jaiñtia pig Butcher Association u la ther ruh halor ka jingkren jong u Bah Prestone Tynsong, symbud Myntri Rangbah ka jylla u ba la kren sha ki paidbah da kaba ong “Husiar ban bam doh sniang”, namar kane ka jingpynmih ïaka kyntien husiar ka pyntieng ïaki paidbah ban bam doh bad ka ktah ruh ïa ngi kum ki nongkhaïi bad nongot doh sñiang.
U Bah Andie u la buh ruh ka jingkylli sha u bah Prestone, Hato ka la ju don mo ka jingkem pang jong ki briew lane ka jingïap jong ki briew naka jingbam ïaka doh sniang? Ha kaba naka liang ki doctor, ki ophisar ba dei peit bad khmih ïaki mrad ki la pyntikna ba kane ka jingpang ka la duna hapoh ka jylla bad kan nym don jingktah lada ngi shet bha ïa ka doh, ban shu kynthoh da kaba ong Husiar ban bam doh sniang ka dei kaei kaei kaba bakla, ong u bah Anddie Lyngdoh.
U Bah Andie u la ïathuh ruh, ba kane ka jingïakynduh bad ki ophisar jong ka tnad Veterinary ki la ioh ban ïa pynbeit naduh mynta ka sngi, ba kino kino ki briew kiba wan ban shalan ïaki sniang nabar ka jylla ki dei ban ioh shwa ïaka Certificate na ki doctor halor ka koit ka khiah jong ki sñiang hashwa ban pynrung shapoh ka jylla Meghalaya bad lyngba ka jingbud ryntih ïa kine ki kyndon, ki paidbah kin ïoh ban bam ïaka doh ka ba biang bad ka byn nym ktah ïaka koit ka khiah.
U Bah Andie u la ïathuh ruh,naka bynta ban long shngaiñ ban bam ïaki mrad kiba shalan nabar ka jylla, naka liang kane ka kynhun ki la ïoh ruh ban ïa pynbeit bad ki nongkhaïi doh naka jylla Assam ba kin buh noh da ki doctor ha man ki jaka ri sñiang (Pig Farm), bad ha shwa ban shalan shapoh ka jylla meghalaya ki dei ban ïoh ïaka certificate naki doctor na Assam bad kino kino kiba khaïi sñiang kin hap ban wan rah ïaka certificate bad ban pyni haka kajaka peit bad khmih kaba don ha Byrnihat, bad naka liang ki doctor jong ka jylla Meghalaya kin peit bñiah hashwa ba kin rung shapoh ka jylla bad kin sa ai ruh ïaka certificate halor ka koit ka khiah jong kine ki mrad khnang ba kan long ka jingshngaiñ ïaki paidbah kiba bam doh sñiang, u la bynrap.