Shillong, Lber 25: Ka College of Community Science, Central Agricultural University(Imphal) Tura, Meghalaya, ka la plie ïa ka Program- National Workshop on “Building a Strong Foundation: Understanding the National Curriculum Framework of NEP 2020 on Early Childhood Care and Education (NCFECCE).” Ïa kane ka prokram la pynlong ha Multi- Purpose Hall, CCS, CAU (I), Tura, ha kaba la ïohi ïa ka jingïashim bynta jong kiba bun kiba la shah khot sngewbha, ba kynthup ïa ki academician, bad ki riew shemphang haba ïadei bad ka jingdonkam ka pule puthi na ka bynta ki khynnah.
Ïa kane ka prokram la sdang da ka jingtbeh ïa ka sharak, ba la pynbud da ka jingrwai duwai bad ka jingpynkup burom ïa kiba la shah khot sngewbha.
Na ka liang Dr. Jyoti V. Vastrad, Dean ka College la pdiang sngewbha ïa u kongsan bad kiwei kiwei kiba la shah khot sngewbha bad banjur halor ka jinglong kongsan ka Early Childhood Care and Education (ECCE) hapoh ka NEP 2020. Dr. Vastrad u la ai ruh ka jingïaroh ïa u Rakkam A. Sangma, Myntri ka tnat pule puthi ka sorkar jylla Meghalaya, halor ki jingpyrshang jong u ban pynkhlaiñ ïa ka ECCE bad u la pynpaw ruh ka jingkyrmen ba ka Meghalaya kan sa long kum ka national model. La banjur ruh halor ka Laboratory Nursery School ha ka college, kaba dei ban shakri kum ka pdeng jong ka experiential learning, skill development, bad kiwei haba ïadei bad ka pule puthi.
Katba u kongsan u Rakkam A. Sangma, u la banjur halor ka jingdonkam ban bteng ïa kane ka kam pule puthi da kaba ong ruh ba ka pule puthi ka dei ka kam kaba ïai bteng kaba lah ban pynwan dur ïa ki riew shimet bad ka imlang sahlang. U la banjur ruh halor ka jingdonkam na ka bynta ka skill-based education, da kaba pynthikna ruh ba ki samla hapoh ka ri kin dei ban long kiba la biang ban long ki atiar na ka bynta ka lawei jong ki bad ka ri. Haba kren shaphang ka National Education Policy (NEP), u la pynshlur ïa ka jingdonkam ban pynïasoh ïa ki jingtip ba tynrai bad ban pynïasoh pat bad ki jingtip kiba mynta. U Myntri u la kren ruh halor ka jingkoit jingkhiah ki longkmie bad ki khynnah da kaba pyntip ruh ba ka sorkar la leh bun ki kam ha kaba ïadei bad ka jingkoit jingkhiah ki khynnah bad ki kmie ki kpa bad kumjuh ruh ha kaba ïadei bad ka jingnang jingtip bad ki kam ka koit ka khiah.
Katba u Jagdish Chelani, IAS, Deputy Commissioner, West Garo Hills, u la banjur halor ka bynta jong ka Early Childhood Education (ECE) na ka bynta ban pynwandur ïa ka lawei ki khynnah. Haba kren ha ka workshop ba la pynlong da ka College of Community Science, CAU (I), u la banjur halor ka jingdonkam ka pule puthi kaba dei ka bynta ka ban ailad ban kyntiew ïa ka ïoh ka kot bad ka jingnang jingtip.
La ïoh ruh ka jingkren na ka J.S.D. Maiong, Member of the Meghalaya State Commission for Protection of
Child Rights, na u Ganesan P, IFS, Divisional Forest Officer, West Garo Hills, Tura, na Dr. Kh. Ringsuachong Aimol, Associate Professor, Department of Human
Development and Family Studies, bad kiwei kiwei.
