Ka jingmut ki kam jngohkai ba don jingkitkhlieh ka long kaba myntoi shibun: Director Tourism

Shillong, Nailur 27: Ka Meghalaya ka la shim ïa ka kyrdan kaba longpdeng ha ka ban pynneh ïa ki jaka jngohkai hapoh ka ri India ha kaba ka tnat Tourism, ka sorkar jylla Meghalaya, ha ka jingïatreilang bad ka Outlook Responsible Tourism, ka la pynlong ïa ka 3rd Indian Responsible Tourism State Summit (IRTSS) 2025 ha ka World Tourism Day hapoh ka State Convention Centre. Ha kane ka sngi la sam ïa ki khusnam sha ki nonglam khmat ha ka kam jngohkai, nangta kiba leit sha ki jaka bapher bapher bad ki nongwan jngohkai.
Kane ka edition jong ka IRTSS, hadien ba artylli ki edition ba la dep ki la long kiba jop ha Meghalaya, la rakhe ïa ka jingsdang ka tourism, ka jingbatai halor ki jingïohmad lyngba ki jingleit sha ki jaka jngohkai bapher bapher. Kane ka prokram ka pynpaw ruh halor ka jingkyntiew ïa ka kolshor bad ka jingkitkhlieh ban ïada ïa ka sawdong sawkun lyngba ki lad jngohkai, ka ban buh ïa ka Meghalaya ha ka kyrdan kaba kyrpang haba ïadei bad ki kam jngohkai hapoh ka ri India.
Ha ka jingkren jong ka, ka Kong Brenda Lee Pakyntein, MCS, Joint Secretary & Tourism Director, ka sorkar Meghalaya, ka la banjur ïa ka jingdonkam ban shim jingkitkhlieh na ka bynta ban pynneh ïa ka kam jngohkai. Ka la ong, “Kane ka jingmut jong ka kam jngohkai kaba don jingkitkhlieh ka long kaba myntoi shibun. Ka kam pynneh ka long kum ka jingïakynduh ïa ki jingdonkam jong ngi khlem da ktah ïa ki jingdonkam kiba hadien habud.”
Ka la bynrap ba ki lad jingtei ba ïasngewthuh jingmut hapdeng ki nongshong shnong, naduh ki karkhana, ki shnong ki thaw bad kiwei haba ki don ka jingïatreilang ka long kaba donkam ban pynneh slem ïa ki kam jngohkai. Ka la ong, “Kaei kaba ngi donkam shisha ka dei ban thaw ïa ka jingïasngewthuh lang bad ki karkhana; nangta bad ki briew manla ka sngi kiba don bynta ha ki kam jngohkai, nangta ki briew kiba im kamai jakpoh na ka kam jngohkai, nangta ki nongshong shnong kiba kyntiew ïa ki kam jngohkai ha ki thaiñ nongkyndong. Kumta ngan long kaba kmen bha ban ïohi ba ngi lah ban pynïaid ïa kine ki kam shalyndet jong ki 4 kynroh lyngba ki jingïasyllok, bad ban wanphai biang da ki jingtip ba la ïohlum ban ïakren ban pyni bad lada donkam ban sdang biang ngi lah ban leh ïa kata.”
Katba u Gerald Samuel Duia, nongseng ka Duia Trailblazers, u la pyni ïa ka case study halor ka Tourism bad ki jingkylla kiba neh, da kaba pynpaw ruh ka jingsngewkhia halor ki jaboh na ki ñuit ki ñier, ki jingbym kit khiah ki kam ba leh da kiba wan jngohkai, ka jingbun palat ki briew, bad ka jingheh ka kam jngohkai. U la banjur ia ka jingdonkam ban ïapyrshang lang khnang ban lah pynneh ïa ka Meghalaya.
Kiwei kiba kren ki kynthup ïa Dr Tsewang Namgail, Director ka Snow Leopard Conservancy India Trust, uba la pynshlur ïa ka jingshem thymmai ha ka kam jngohkai kaba ym dei ban ktah ïa ka sawdong sawkun, bad u Sunil Verghese, Director of Dune Wellness, uba la pynpaw ïa ki lad ki lynti ka wellness tourism ha Meghalaya, da kaba ai nuksa ïa u Shynrai Lakadong uba dei u jingthung uba ai ki jingmyntoi ïa kiba bun.
U Priya Krishnamoorthy, Founder & CEO ka 200 Million Artisans, u la kyntu ïa ki samla ba kin leit shang sha ki jaka jngohkai bad kumjuh ruh ban long ki nongïathuh khana lyngba ki jingshem kiba thymmai.
Ka la don ruh ka panel discussion kaba ai kyrteng ka Responsible Tourism in Meghalaya: A Collective Vision ba la batai da u Bah Benedict Skhemlang Hynniewta, visual artist bad musician, u Bah Adonijah Lyngdoh, Culinary Expert, u Sanjay Sondhi, Founder and Trustee ka Tittli Trust, bad kaba la pynïaid da ka Nishtha Pandey ka Outlook Responsible Tourism. Ka jingïasyllok ka buh ka thong ban kyntiew bad pynneh pynsah ïa ka kolshor ka Meghalaya, ki rukom bam, ka mariang bad ka tem ka put bad kumjuh ruh ban pynneh ïa ka jingleh ki longshwa bad ki jingithuh ïa ka.