Ka jingmih pathar ki dukan kiad bad wine store ka la ktah shibun ïa ki ïing ki sem, maham ka EC KHADC

Shillong, Nohprah 04: Ka Executive Committee jong ka Khasi Hills District Council, ha ka jingïalang kaba la long ha ka 19.11.25, ka la sngewkhia ïa ka jingmih pathar ki dukan kiad (Wine Store) bad kiwei kiwei ha ki shnong ki thaw hapoh ka jingpeit jingkhmih ka Khasi Hills Autonomous District Council kaba ktah shibun eh ïa ki ïing ki sem bad ka imlang sahlang jong ka jaitbynriew Khasi.
Kumta halor kane na ka liang ka KHADC ka la shim ïa ka rai ban mana bad ban bthah ïa baroh ki rangbah shnong, ki Sordar, ki Matabor bad ki myntri jong ki shnong.
Ka KHADC ka la bthah ruh ba kim dei ban ai jingbit (NOC) ïa kino kino ki dukan kiad (Wine Store/Pata kiad hapoh u pud u sam jong ki shnong jong ki.
Ba kin ym ai ïa kino kino ki jingbit ïa ki dukan buh mar (Bonded Warehouse) kiba shalan na shabar ka jylla kiba hap hapoh u pud u sam jong ki shnong jong ki.
Ka KHADC ka bthah ruh ba kim dei ban ai jingbit ïa ki karkhana kiba pynmih ïa ki jingdih pynbuaid (Alcohol Beverages) kiba hap hapoh u pud u sam jong ki shnong jong ki, bad ka jingai jingbit lah ban ai tang ïa kito kiba la ïoh ki jingmynjur na ki dorbar shnong ryngkat ka jingmynjurlang jong ki paid nongshong shnong baroh kawei.
Halor kane na ka liang ka Executive Committee, KHADC ka kyrpad ïa ka jingïatreilang na baroh ki liang khnang ban wanrah ïa ka bha ka miat bad ka suk ka saiñ ha ka imlang sahlang bad kane ka jingpynbna kan treikam noh mardor tad haduh ban da ai hukum da kumwei pat, ong ka kyrwoh ba la phah da u EM ba khmih ïa ka tnat Elaka Administration ka KHADC u Bah Denzil Raynard Chen.