Shillong, Naitung 26: U nongïalam ka liang pyrshah ha Khasi Hills Autonomous District Council (KHADC) u Bah Titosstarwell Chyne u la pynpaw ïa ka jingbym sngewhun ïa ka mang tyngka ba la mynjur da ka Executive Committee ba la ïalam da ka Voice of the People Party (VPP) ha ka dorbar lyuir kaba dang shu dep.
Haba kren sha ki lad pathai khubor ha ka sngi Thohdieng, u Bah Chyne u la batai ba ka mang tyngka ka la dei kaba ym treikam eiei bad u la pynrem ïa ki rukom pynïaid kam ba la bud haba wanrah ïa ka mang tyngka, kyrpang eh haba tynsat ïa ka “supplementary expenditure” na ka bynta ka snem 2024-25.
U nongïalam ka United Democratic Party (UDP) u la buh ka jingkylli halor ka jingkam ba ka mang tyngka ka dei kaba pahuh, da kaba pynpaw ruh ka jingsngewphylla halor ka rukom pynïaid ïa ka pla tyngka da ka council.
“Ha nga naduh kato ka sngi ba ki la wanrah nga sngew ba ka mang tyngka ka dei ka bym treikam eiei. Watla ki ong ba ka mang tyngka ka dei kaba pahuh. Kata ruh ngam tip ha kano ka rukom ki la ong ba kadei kaba pahuh hynrei to ngin ïa ap bad ngin ïa peit,” ïathuh u Bah Chyne sha ki lad pathai khubor.
Haba kylli, u Bah Chyne u la ong ba ki paidbah suki suki kin sa bishar ïa ki kam ba la leh da ka executive committee, ban ïa ki jingai jingmut kiba shimet.
Kum u nongmihkhmat ba la shah jied, u Bah Chyne u la banjur ba kane ka agenda kaba nyngkong ka dei ban pynhun ïa ki jingkhmih lynti jong ki paidbah kiba la jied ïa u.
Haba kylli la ki khyrdop lum khajna ki dei kiba beaiñ ne em, u Bah Chyne u la kdew da kaba ong ba u Executive Member-in-charge u la ïathuh shai ba baroh ki toll gate ki dei kiba shong aiñ ha kane ka dorbar ba dang shu dep.
U la ai jingmut da kaba ong ba ka shong ha ka EC ban pynshai sha ki paidbah ba kine ki khyrdop lum khajna kidei shisha kiba shong aiñ.
