Ka jingma shah sei pisa tuh lyngba u Aadhaar Number, maham ki Pulit CID ia ki paidbah

Shillong, Jylliew 03: U Superintendent of Police (CID), u la ong ba ki don ki briew ne ki kynhun kiba thok ban shim kabu ban kamai pisa lyngba u Aadhaar Number lyngba kata kaba ki ong ka Aadhaar Enabled Payment System (AePS).
Lyngba kane ka buit jong ki da kaba wad ïa u Aadhaar Number, u Mobile Number ba la ai ha ka Aadhaar Card ban tip ïa ki jingtip kiba la buhrieh jong ki paidbah bad kiwei kiwei de ki jingtip khnang ban ïoh kamai pisa da kaba wad pat ïa ka jingdon pisa ki briew ha Bank bad ban sei pisa na ki Account jong ki, namar ba ka Aadhaar Card ka don jingïasnoh bad ka Bank Account. “Kine ki riewthok riew shukor, ki sei pisa na ki Account jong ki paidbah, khlem ka jingtip ki trai”, la ong u SP (CID) ha ka jingpynbna paidbah mynta ka sngi.
Ha kajuh ka por u SP, ula kyntu ruh ïa ki paidbah ba kim dei ban shu ai kulmar ïa u Aadhaar Number ne kino kino ki jingtip shaphang ïalade, khlem da thikna bha ïa ki briew kiba phone ne kiba pan markhmat.
Ha kajuh ka por, ka tnad CID ka kyntu ruh ïa ki paidbah ba kin leit ban pynkylla noh ïa u Mobile Number ba la ai por ba pyndap form ban shon dur Aadhaar, ha kino kino ki jaka ba jan tam kiba shon dur Aadhaar.
Shuh shuh u SP, u kyntu ruh ïa ki paidbah ban khang noh ïa ki Biometric jong ki na kane UIDAI Website https://resident.uidai.gov.in/bio-lock khnang ban nym don mano ba pyndonkam bakla ïa u Aadhaar Number.
Kumba long mynta u Aadhaar Number ne ka Aadhaar Card kadei kaba ki paidbah, wat sha ki nongkyndong ruh ki la pyndonkam, namar ba ka sorkar pdeng halor ka rai jong ka ïingbishar ba ha khlieh duh jong ka ri India, ka la ong ba kino kino ki Social Security Scheme ne skhim sorkar, kum u khaw reshon, skhim shna ïing baduk, bai bam tymmen, skhim ïap lok, skhim rep, scholarship bad bun kiwei kiwei de ki jingïarap na ka sorkar la pan Aadhaar Number beit.
Kiba la batai bha halor ka jingma na u Aadhaar, khamtam ïa ka jingshah tuh jingtip jong ki briew shimet, ki la ong ba kane ka jingmih ne ka jinglah ki briew ban tip bun kiei kiei lyngba ka Aadhaar Card kan buh ka jingeh bad ka jingma kaba khraw ïa ki paidbah ,khamtanm sha ki jaka nongkyndong, namar wat ban shon dur Aadhaar ruh ki shem jingeh, ban leit kylliang phone number ne ban khang lyngba kane ka website ba la ai kan pynkulmar jingmut shibun ïa ki paidbah.