Ka jinglong Nongïalam kam dei tang ha ka nam bad kyrdan hynrei ban don ka jingbahkhlieh ruh : Lat

Shillong, Kyllalyngkot 02 : U Lat ka Jylla Meghalaya u CH Vijayashankar ula banjur ba ka jinglong nongïalam kam dei eh tang ka nam ne ka kyrdan, hynrei ka dei ka jingbahkhlieh kaba suhthied ha ka jinglong bad ka jingshakri ïa ka imlang sahlang.
Haba ai jingkren ha ka jingïalang ha ka sngi Thohdieng, u Vijayashankar ula ai khublei ïa ki samla kiba la shah jied na kylleng ka ri bad kiba mihkhmat ïa ki jingangnud jong ka jylla Meghalaya ha ka Viksit Bharat Young Leaders Dialogue 2026.
U Lat ula banjur ba ka jinglong nongïalam ba shisha kam dei shaphang ka bor, hynrei ka dei shaphang ka jingpynkupbor bad ula kyntu ïa ki samla ba kin long kiba don ka jinglong ba ryntih, kiba ïaineh bad kiba kut jingmut ha ki thong jong ki.
Ula kyntu ïa ki samla ba kin pyndonkam hok ïa ka rynsan jong ka ri ban wanrah ïa ki jingmut kiba noh synniang ha ka rukom kaba seisoh ïa ka jingthmu jong ka Viksit Bharat bad ula ai ruh ïa ki nuksa kiba ai mynsiem ïa ki samla kiba la jop bad ula sam ïa ka khana shaphang i Kong Rifiness Warjri, ka dkhot jong ka NCC na Meghalaya, lyngba ka jingkut jingmut, ka jingngeit bad ka jingtrei shitom, ka la kiew ïa u lum Everest ha ka rta kaba 20 snem.
Ula ong, ba ka jingjop jongka, ka pyni kumno ka jingshai jong ka jingthmu bad ka jingminot ka plie lad ïa ki samla ban jop ïa ki jingeh bad ban ïoh ïa ka jingjop kaba phylla.
Ka Jylla Meghalaya kala ïoh ban mihkhmat ha ka Viksit Bharat – Design for Bharat track, ha kaba arngut ki samla pule na ka National Institute of Technology, Shillong, u Nishant Kumar Singh bad ka Necharika Singh, kila shah jied ha ka ri baroh kawei.
Ka jingsaiñdur thymmai jongki, ka Smart Braille Watch, ka dei ka tiar ba lah ban deng ha ka met, kaba la shna khnang ban ïarap ïa ki briew kiba don jingduna ka bor ïohi ban tip ïa ka por bad ki jingpynbna lyngba ka ‘Tactile Braille Output.
Ka projek ka pynleit jingmut sha ka jingjem dor, ka jinglah ban kynriah bad ka jingsuk ban pyndonkam, da kaba pynbeit ïa ki jingduna kiba ïadei bad ki tiar Braille kiba la don lypa.
Ki nongsaiñdur ki don mynta ha New Delhi ban pynkhreh ban pyni ïa ka projek jong ki ha ka rynsan jong ka ri, ha ka jingïadonlang u Myntri Rangbahduh ka ri u Narendra Modi bad kiwei ki riewshemphang.
Haba kren halor ki jingangnud, ka Ashita Kar, ka samla kaba pule ha ka Klas XI na East Khasi Hills District kala ong, “Kane ka dei ka sien kaba ar jong nga ban ïashimbynta ha ka National Youth Festival kum shi bynta jong ka Viksit Bharat Young Leaders Dialogue. Ngan pyni ïa ka jingthmu jong nga halor ka jingtei ïa ka kynhun treikam kaba la pynkhreh na ka bynta ka lawei na ka bynta ka Viksit Bharat. Nga kyrmen ba ïa ki jingmut jong ki samla na kylleng ka ri yn pdiang bad pyntreikam na ka bynta ka Viksit Bharat 2047.”
U Akbarlang Synteng Nongdhar na East Khasi Hills District, u ban mihkhmat na ka Meghalaya ha ka thup Folk Dance, ula pynpaw ka jingkmen, da kaba ong, “Nga sngew sarong ban mihkhmat ïa ka Jylla Meghalaya hakhmat ka ri. Kum ki samla, ngi khmih lynti ïa ka jingïalam lynti bad kiwei kiwei ki lad kiba kum kine ban pyni ïa ka kolshor, ka pateng bad ka sap jong ngi ha ka rynsan jong ka ri.”
U Elbonson Marbaniang uba dei u coach ïalehkai phutbol na Mawsynram, East Khasi Hills District ula ong, “Ngin pyni ïa ka shad tynrai ‘Ka Shad Mastieh’ ha New Delhi. Ngi kyrmen ban mihkhmat ïa ka Jylla Meghalaya da ka jingsarong bad ban pyni ïa la ka sap ka phong hakhmat ki nongshah khot sngewbha na kylleng ka ri.”
La jied haduh 25 ngut ki samla na Meghalaya ban ïashim bynta ha ka Viksit Bharat Young Leaders Dialogue 2026.
Ïa ki ‘Delegate’ la jied lyngba ka rukom jied ba bun kyrdan kaba la sdang da ka Online Quiz ha baroh kawei ka ri kaba la pynlong lyngba ka My Bharat Portal ha u Nailur–Risaw 2025, kaba la sakhi ïa ka jingïashim bynta jan 50 lak ngut ki samla na kylleng ka ri.
Na Meghalaya kila don haduh 2,393 ngut ki samla kiba la ïashim ha ka Quiz, ha kaba 475 ngut ki la ïoh lad ban ïashim bynta ha ka bynta jong ka Online Essay.
Ki nongïashim bynta kiba la shah jied kila phah ïa ki Essay ba la pynshong nongrim ha shiphew tylli ki phang pdeng ba kongsan jong ka Viksit Bharat Challenge.
Hadien ka jingjurip jong ki riewshemphang ha kane ka kam katkum ki jingbthah jong ka Ministry of Youth Affairs and Sports, Government of India, 88 ngut ki samla na Meghalaya kila poi sha ka bynta jong ka State Championship.
Ia kane ka jingiakop hapoh ka jylla la pynlong ha ka 13 tarik u Nohprah 2025, ha kaba ki nongïashim bynta ki la pyni ïa ki jingmut jong ki lyngba ki jingpyni PPT hakhmat ka kynhun bishar kaba kynthup ïa ki riewshemphang. ïa ka jingjied kaba khatduh ha ka ri la mynjur da u nongpynïaid ba la thung da ka Ministry hadien ka ‘Interview’.
Nalor kane, ki don 23 ngut ki samla na ka jylla Meghalaya ki ban ïashim bynta ha Cultural Track, ha kaba kin pyni ïa ki jingrwai bad jingshad tynrai, katba lai ngut ki samla kin ïashimbynta ha ka declamation, poetry bad painting.
ïa kine ki nongïashim bynta la jied napdeng ki 1,000 ngut ki samla kiba la ïashim bynta ha ka State-level Chief Minister’s Youth Engagement Programme kaba la pynlong ha NEHU naduh ka 2 haduh ka 5 tarik u Nohprah 2025.
Ki samla kiba la shah jied kin ïakren bad u Myntri Rangbah duh ka ri, u Narendra Modi ha ka 11 tarik Kyllalyngkot 2026 ha ka National Youth Festival.
Ha kane ka prokram la ïadonlang u S. P. Singh, State Director, My Bharat Kendra; Bah F. Rummong, Deputy Director bad State NSS Officer; Bah Paia Nongbri, Deputy Director jongka Directorate of Sports and Youth Affairs, ka Kong Darlene Khonglam, Sports Officer jongka Directorate of Sports and Youth Affairs lem bad ki ophisar na ka My Bharat Kendra bad ka Directorate of Sports and Youth Affairs.
Ka Viksit Bharat Young Leaders Dialogue ka dei ka bynta ba kongsan jong ka National Youth Festival 2026 kaba 29, ka ban long ha Bharat Mandapam, New Delhi, naduh ka 9 haduh 12 tarik Kyllalyngkot, 2026.
Ka National Youth Festival ka kynthup ïa saw tylli ki bynta ba kongsan, ka Viksit Bharat Young Leaders Dialogue, Viksit Bharat Cultural Tracks, Viksit Bharat Design for Bharat, bad ka Viksit Bharat Hack for Social Change.