Shillong, Jylliew 19: Kan dei kawei na ki jingleit on tep ba pynmyllung tam ha ka thaiñ West Khasi Hills bad wat ha ka jylla hi ri baroh kawei. Kane kadei ka jingleit on tep ïa i Caffinia Nongsiej, 15 snem bad i Maianylla Nongsiej 10 snem, ki arngut ki shipara kiba la ïap ha ka jingshah ban ka ïing ha ka khyndew ha Nongstoiñ myn ha ka 17 tarik mynta u bnai.
Kaba pynmyllung ïa kiba bun kadei namar ba kine ki arngut kidei kiba la duh noh ïa la jingim napdeng ki arngut kiwei pat ki shipara ryngkat bad u kpa ha ka sngi ba jia ka jingtwa khyndew. Kawei pat kaba long ka daw jong ka jingmyllung kadei ba i Caffinia idei ki nongrwai jong ka Kids’ Tarari Choir, ka kynhun nongrwai ki heprit na Nongstoiñ kaba ym dei ba kadei kaba pawnam, hynrei kadei kaba la ïoh ïa ka jingieit jong ki paidbah namar ki sur, ka rukom rwai jong i Caffinia bad kiwei pat ki dkhot kane ka kynhun.
Ha ka sngi leit on tep mynta ka sngi, da ki spah ngut ki paidbah na kylleng kylleng, kynthup ia ki khynnah skul bad ki nonghikai ka St. Peter, Pyndengrei, ki nonghikai bad ki dkhot ka Kids Tarari Choir bad dei ha ka por ba ki rwai ma ki ba ka la mih ka jingïam paitdohnud na ki nongrwai bad kaba la pynlung mynsiem ruh ïa loba wan on tep kiba kiba bun kim leh khlem da kun shuh bad ki la ïa ïam lang.
La pynïaid ia ka jingïaseng leit on tep da u Rev. JT Khardewsaw bad la ïadon lang ruh kiwei pat ki Pastor, nangta ki Tymmen Basan, ki Rangbah Balang, ki Sister ka St. Peter bad kiwei kiwei.
La ïoh ban pule ïa ka histori ka jingim jong ki, ha kaba la pynsngew ba ki long ki khynnah kiba tip sngi bad kiba kohnguh sneng ïa ki kmie ki kpa. La pynsngew ruh ba i Caffinia i thmu ban pynmih hi ïa ka jingrwai Ribaibal ba i kwah ban rwai ryngkat kiba haïing hasem.
La ïoh jingkren ruh na i Khynnah Class X bad Khynnah Class IV jong ka St. Peter, nangta na i Leader jong ka Kid Tarari Choir bad kumjuh ruh ka jingrwai kyrpang na kiba haïing.
