Ka jingleit jurip hi u Myntri Rangbah sha ki shnong ka buh jingkylli ba hato ki MLA NPP ki leh aïu?

H a ka sngi palei, u Myntri Rangbah, u leit jurip ïa ki shnong, kiba hab ha ka Jirang Constituency bad kaba pynkyndit thret, la kumba ïuh tdong bseiñ, ka long ba ka la paw ha ki kotkhubor, ba ka don ka shnong kaba la duh bording ilektrik haduh 18 snem kynthih bad katei ka jong bym ïoh bording, ka la long tang haba la pyntip sha u Myntri Rangbah ka jylla bad kata ruh hana da U MLA jong ka Constituency.
Ym tang kata, u Myntri Rangbah, ula kular ruh ban tap tin thymmai, namar ka jingjaw um jong ka skul Nongspung A, ka skul sorkar kaba la ijot rathai bha.
Khyndiat sngi mynshwa, u Myntri Rangbah, ula hiar ruh sha ka Constituency jong u bad kaba pynkyndit hangtei ruh, ka long ba da ka khynnah skul, ka shimti ïa ka bynta jong U MLA bad ka MDC jong katei ka thaiñ bad haba ka hep rit, ka kren shi kyntien, ka la mih ka rai ban tei syndon ïa ka Ïing jong ka Secondary School ha Tangmang, kaba hab ha Pynursla Constituency.
Kam dei tang kata, la ïohi ruh ba ula poi sha Jowai Constituency ban leit ai jingïarap ïa ka hospital bad plie ïa ka surok thymmai, u leit poi sha Ïewduh ban bei pisa ïa katei ka ïew bad katei ka jingïaid jong u Myntri Rangbah lem bad ka jingkular ïa ki skhim pynroi, ka pyni ba um shaniah shuh, ïa la ki jong ki MLA bad ba u kwah ban rung hi noh dalade sha ki shnong ki thaw jong ka Ri Khasi Jaiñtia baroh kawei.
Hangne, ka mih ka mat ban ïatai, la u MLA, uba don ha ka kyrdan ba ar ha ka sorkar, lane ki MLA, kiba dei na ka seng synshar NPP ha Jirang, ha Jowai, ki leh aïu te, haba ki don ha ka sorkar bad kaei ka matti jongki, na bynta ka Constituency ba ki mihkhmat bad ba ki la shah jied ha ki paidbah ba ki la ïoh ka jingshaniah?.
Ban shu aidaw ba ka MeECL, kam lah ban ai transformer ïa ka shnong, haduh 18 snem kynthih, ka la dei ka jait khana kaba long kam kai, kaba lada phohsniew ïa katei ka jingphoh sniew, haduh ban da ïap ruh, yn nym lah satia ban pom tim, wat tang shisien ruh bad lada ki don shisha, kiba kum kitei ki jait ophisar, ki la dei ban shah khot sngewbha ha ka privilege komiti jong U MLA, ba kin pyni dur ïalade ha ka ïing dorbar.
Na ki jingshisha, kiba paw ha katei ka shnong Pahamjula bad ha Tangmang, ha kaba tang ki skul kiba biang ruh kim don; kumta ka wan ka jingkylli, la ki MLA jong kitei ki ar tylli ki Constituency, kiba don ha ka liang sorkar, ki pyndonkam kumno ïa ka MLA skhim jong ki, ba kim treh ban ïarap ban shna pynbha ïa ki skul ha kitei ki shnong kiba donkam, lane ba haduh katno ba ka tnat pule puthi jong ka sorkar jylla, kan tasngeng haduh katta katta, ba kan nym peit shuh ïa ki skul kiba la jot la pei lada haba ki la long kiba khapngiah bad kiba donkam ban trei pynbha.
Ngin dang ïa peit nangne shakhmat, hynrei ki jingshisha ki kren shai ba u Conrad Sangma, uba dei u heh duh jong ka seng NPP, u thawlad katba lah la ka bor ka buit, ba un bteng biang ïa ka jingsynshar, ha u snem 2028 bad ula ïohi shai ruh ïa ki result jong ka MP bad ka MDC ba la dep, ba ki la pynpar niang khriat ïa u bad ka dei na katei ka daw, ba la sdang ban rung hi ha man la ki shnong ha Khasi Jaiñtia hills, ba un don ka jingsngewjan bad ki nongthep vote jong kane ka thaiñ; hynrei kaba lyngngoh pat ka long, ba balei um leit ruh sha ki Constituency ba ki don ki MLA BJP, HSPDP, UDP lane Congress, hynrei u leit khynra nyngkong shwa ha ki ktem ba khlaiñ jong ka seng NPP?
Hato kitei ki seng saiñ pyrthei kum ka HSPDP, ka UDP lane ka seng Congress kaba don ha ka liang pyrshah ne ka VPP kim kwah mo ne kim pan lem ka jingïarap na u Myntri Rangbah ban jngoh bad khmih lem ïa ki constituency ban theh jingïarap pynroi skhim sha ki constituency jong ki, kiba dang duna?
Watla bun ki la ïaroh ïa kane ka jingleit jurip u Myntri Rangbah sha ki shnong bapher bapher, hato u la ju pan jingkheiñ pat na la ki jong ki nongmihkhmat halor ki skhim ba ai, kane ka pyni shai ba bun na ki MLA skhim la tang da ki katto katne bad tang sha ki shnong ba ki la ïoh bun ki vote ha ki por elekshon.