Ka jingleh khia thew ka NHAI ka pyn kordit ïa ki paidbah kiba ïaid lyngba na ka NH-6

Khliehriat Jylliew 06: Ka jinglong jingman jong ka surok national highway ha East Jaiñtia Hills District khamtam ha sorbah Khliehriat bad ha ki thaiñ Narpuh ka long kaba la wanrah jingeh bad pyn kordit haduh katta katta ïa ki nongleit nongwan namar ka jingjot rathai ka surok khamtam ha Khliehriat West bad ha ki thaiñ Narpuh ka la long shaba palat, kiba bun ki kali khamtam ki kali rit ki liat bad ki sahkut ha ki thliew ba lang um, ka sur na ki paidbah ka mih kiba la ong b kane baroh dei namar ka jingleh khia thew ka National Highway Authority of India ka bym shim khia ban maramot ïa ka surok.
Na ka liang ka Khasi Students Union Narpuh Circle ka la byrngem ba lada ka NHAI kam maramot noh mardor ïa ka surok kaba pei thliew bad jot rathai kaba naduh Mynkre ter ter shaduh Ratacherra, Malidor, ka seng kan leit ban leit khang tala noh ïa ka Tool Gate Plaza jong ka NHAI kaba don ha Lumshnong bad halor kane ka seng ka la ai por ïa ka NHAI tang hapoh ar sngi ba ka dei ban maramot ïa ka bynta jong ka surok kiba la jot rathai bad buh jingeh ïa ki nongleit nongwan.
“Watla naduh ki bnai kiba la leit na ka liang ka seng ka la dep dawa na ka NHAI ban maramot ïa ka bynta jong ka surok kiba la pei thliew bad lang um, hynrei ka paw shynna ba haduh mynta ka NHAI kam treh ban maramot ïa ka surok NH-6 khamtam ïa ka bynta ha jingkieng Tongseng kaba la jur bha ka jingjulor”ong u kyrwoh na u General Secretary KSU Narpuh, u samla S.Bamon.
Ka seng ka pynpaw ruh ka jingsngew khia halor ka jingjot rathai ka surok bad ong ruh ba ki kali kiba iaid lyngba na ka thaiñ Narpuh, kim don shuh pat da kawei ka lynti bad ki hap ban iaid da ka jingkordit na kane ka surok NH-6 bad kane ka ju wanrah ruh ïa ka jingdheng kali kaba khah khah namar ki dang bun ruh ki bynta jong ka surok ha kaba ki kali ki dang lah ban iaid tang shiliang ka surok namar ka jingbym pat lah ban pynkhuid lut ïa ka khyndew kaba twa, ka seng da ka jingsngew khiah ka la pynpaw ba kane ka dei ka jingshah ieh beiñ ka thaiñ ha ka sorkar pdeng bad kumjuh ruh ha ka sorkar jylla.
Ka jingpei thliew ka surok ym tang ba ka pynkordit ha ka leit ka wan hynrei ka pynsniew ruh ïa ki kali khamtam ki kali rit kiba hap ban ngam na ki jaka ba longthliew kiba dap da ka um slap, kiba bun ki kali rit wat ki kali heh ruh ki ju sahkut hapoh ki thliew bad don ki kali kiba la julor ruh, la sakhi ruh ba ka jingsahkut ki kali ha ki thliew ba lang um ka ju jia khah khah ha sorbah Khliehriat kaba dei ka Head Quatar jong ka District,ha surok ha ki thaiñ Narpuh bad ha jingkieng Tongseng bad ka ju wanrah ïa ka jingdheng kali kaba khah khah