Ka jingkyrpad na ka KSU bad SSASA : Ka jingïaleh kam long pyrshah Assamese bad Khasi hynrei ïa ka Sorkar Meghalaya bad Assam

Shillong, Naiwieng, 25: Ka Khasi Students’ Union (KSU) bad ka Shillong Socio-Cultural Assamese Students’ Association (SSASA) ha ka sngi Thohdieng ki la pynrem jur ïa ka jingsiat ïap jong ki Pulit Assam ïa ki san ngut ki Pnar na ka shnong Mukroh bad ïa uwei u nongtrei khlaw ka Assam ha ka step jong ka 22 tarik mynta u bnai ha ka shnong Mukroh, West Jaiñtia Hills District. Kine ki ar tylli ki kynhun ki la phah ruh ïa u kyrwoh sngewlem sha ki bahaïing hasem jong kiba la khladnoh ha kane ka jingjia.
Ha u kyrwoh ba la soi da u General Secretary ka KSU u Samla Donald V. Thabah bad u President ka Shillong Socio-Cultural Assamese Students’ Association (SSASA) u Surajeet Hazarika ki la ong, “ka jingïadei hapdeng ki Khasi bad ki Assamese kam dei tang na ka daw ba ki don marjan hynrei lada phai dien sha ka pakit ki mynnor, yn lap ïa ki sakhi ba kine ki ar jaitbynriew ki ju don ka jingïatreilang, ka jingïasam ïa ka kolshor bad ka jingïadei ha ka khaii ka pateng.”
“Ki nongsiat khnam Khasi ki dei kiba la don bynta bad ka kynhun shipai bakhlain bor jong u General Lachit Borphukan ban ïakhun pyrshah ïa ka jingshah dakhol ha ki Mughal,” la kdew kine ki ar seng ha u kyrwoh.
Kine ki ar tylli ki kynhun ki la pynshai ba ka jingjia ba dang shen ha ka shnong Mukroh kam dei satia na ka jingïapher jaidbynriew lane ka jingïapher jingmut hapdeng ki Khasi bad ki Assamese hynrei ka dei beit hapdeng ka Sorkar Assam bad ka Sorkar Meghalaya bad ka jingbym lah ban ïapynbeit ïa u pud u sam uba la sah pohing la 50 snem kynthih ka la wanrah ïa ka jingduhei jong kiba bun ki mynsiem briew.
“Katkum ka jingsngewthuh ba ki nongshong shnong jong ka jylla Assam ki dei kiba don bynta ha ka jingjia ha ka shnong Mukroh. Ka jingïadei bad hapdeng ki Khasi bad ki Assamese kaba naduh ki por hyndai kam satia ban shah pynjngut noh da ki jingbym ïasngewthuh jingmut bad na ki khubor hamsaïa ha kum kane ka khyllipmat,” la ong shuh shuh u kyrwoh.
Kum ban shu pyntip hangne ba ka KSU bad ka All Assam Students’ Union (AASU) ki dei ki kynhun jong ki seng samla pule kiba don hapoh ka shatri jong ka North East Students’ Organisation (NESO) kiba ju pyntyllun lang ïa kijuh ki jingthmu bad ki jingangnud.
“Ka KSU bad ka AASU ki ju ai jingkyrshan iwei ïa iwei pat khamtam ha kaba ïadei bad ka jingkhynra mynder lane ka Anti- Foreigners’ Movement ha baroh ar tylli ki jylla,” la ong u kyrwoh.
“Ka SSASA ka ju ai jingkyrshan ïa ki jaidbynriew Khasi naduh ki snem 1970-1980 ha Meghalaya haba ki la jia ki jingïakhih beh mynder bad ha nongbah Shillong. Haduh mynta, baroh ar tylli ki kynhun ki ju ïatreilang ban pynneh ïa ka jingïadei hapdeng ki Khasi bad ki Assamese ha ka jylla Meghalaya,” la u kyrwoh.
Kine ki ar tylli ki kynhun ki la kyrpad ïa ki paidbah ba kin ym shah ïalam bakla ha ki khubor hamsaïa la ka long ha nongbah Shillong lane ha Guwahati.
Ki la kyntu ïa ki paidbah ba kin kiar na kaba pynphriang ïa ki khubor bym dei bad ban phah ïa ki kyrwoh ba pynkhih thma khamtam ha ka rynsan Social Media kaba lah ban lam sha u pud jong ka jingbymïasngewthuh jingmut.
Ka KSU bad ka SSASA ki la dawa ïa ka Sorkar Meghalaya ban buh ïa ki Police Outpost ha ki jaka ba kham jia ki jingïakajia ha khappud, ban kem bad ban pynshitom katkum ki kyndon jong ka aiñ ïa ki briew kiba donkti ha ka jingsiat ïap ïa ki san ngut ki nongshong shnong ka Mukroh bad ban pynstet ïa ka jingïapynbeit pud da kaba sngap ïa ka sur jong ki paidbah kiba shong basah ha khappud.