Shillong, Nailur 26 : U Myntri Rangbah ka Jylla Conrad K Sangma ha ka sngi Nyngkong u la ongba ka jingkyrduh kam kadei ka mat kaba ktah jur kaba baroh ki sorkar ki kynduh.
Haba kren bad ki lad pathai khubor, u Myntri Rangbah u ong ruh ba katei ka jingeh kam dei satia kaba ktah tang ha kane ka jylla hynrei kadei kaba ktah salonsar ha baroh kawei ka pyrthei.
Tangba, u ong pat ba ïa kane ka jingeh lah ban ïakhun tang da kaba kyntiew ïa ka jingseng kam lajong. Katkum ka jingong jong u, ki la don palat 1000 ngut ki nongseng kam lajong kiba ka sorkar ka la kyrshan kynthup ïa ki Self Help Groups ha ki shnong ki thaw bad kine hi ki long ka jingplie lad ha ka seng kam lajong la ka long haba ïadei bad ki jaka sah kai pyngad, ki kali ban kit ïa ki nongleit jngohkai pyrthei bad ruh haba ïadei bad ki kali kit mar rep.
“Ka jingkyrduh kadei ka jingeh kaba mih beit kaba baroh ki sorkar ki mad bad kane kam dei tang ka Meghalaya kaba mad,” u la bynrap shuh shuh haba jubab halor ka jingthmu jong ka FKJGP ban pynlong da ka jingïaid paidbah ban dawa na ka sorkar ba ka rukom thungkam thungjam ha ki tnad sorkar kadei ban long kaba khuid bad kaba beit.
U Myntri Rangbah u la pyntip ruh ba ka sorkar jylla ka la dep ban pynbna haduh 2300 tylli ki kam nonghikai bad na kane kumba 1300 tylli la dep ban pyndap ha kaba ki nonghikai kontrak ki don.
